Oranjestad, Aruba – 2 februari, 2024 –  Fundashon Stimami Sterilisami ta sumamente contento di anuncia cu Les Cappuchinas Café & Eaterie a lansa un iniciativa conmovedor y un menu delicioso cu e meta pa recauda fondo pa sostene e esfuersonan di Stimami Sterilisami pa yuda combati e crisis di cacho y pushi riba caya. E menu special lo ta disponibel durante henter e luna di februari, of manera e ekipo di Les Cappuchinas ta yame “E Luna di Amor pa nos Mascotanan.”

Den e promocion special aki, e café elegante situa den e curason di Oranjestad, lo ofrece cuminda y bebida exclusivo incluyendo e Dalmatian Latte (Oreo Latte), Dalmatian Croffle (Oreo Croffle), Paw-shaped Butter Cookies, y Cupcakes tematico. 80% di e entrada di e bentananan aki lo ser dona generosamente na Stimami Sterilisami, yudando e fundacion den su esfuersonan pa sterilisa cacho y pushi, y conscientisa pueblo di e necesidad pa cuida nan mascota.

 

Descubri e encanto di Les Cappuchinas cu su indoor-dining elegante y comodo, of sinta pafor den nan hardin bunita y pet-friendly. E oasis sereno aki, rodea door di matanan di fruta manera Dragonfruit, Mango, y Soursop, ta ofrece e ambiente perfecto pa saborea nan cuminda dushi hunto cu bo mascota. Ademas, e café tin un ambiente trankilo cu Wi-Fi, brinda brindando nan clientenan un espacio perfecto pa relaha, traha of gosa.

 

“Na Les Cappuchinas, nos ta kere den e poder di comunidad y compasion pa haci un diferencia real. E colaboracion aki cu Stimami Sterilisami ta encarna nos vision comparti y esfuersonan pa un futuro miho pa cacho y pushi riba nos isla. Hunto, por medio di e iniciativa special aki, nos ta mira pa no solamente recauda fondo, pero tambe pa lanta conscientisacion tocante e asuntu critico di sobrepoblacion di animalnan sin doño. E ta mas cu solamente sirbi cuminda y bebida delicioso; e ta tocante sirbi nos comunidad y duna bek na esnan cu no tin un bos. Nos ta orguyoso pa traha huntu cu Stimami Sterilisami y ta invita nos clientenan pa uni cu nos den e meta significativo aki,” Susanne Li, Directora di Les Cappuchinas ta comparti.

 

Fundashon Stimami Sterilisami ta profundamente agradecido pa e apoyo increibel di henter e team di Les Cappuchinas Café & Eaterie. Nos ta invita henter comunidad pa bishita e café, y disfruta di e promocion dushi y significativo aki. Bo participacion lo contribui na un futuro mas briyante.