ORANJESTAD: Diabierna atardi, Minister Endy Croes a presencia e di 45 Jump Up Escolar organisa pa Colegio Laura Wernet-Paskel.  E jump up a sali for di parkeerplaats di Colegio Laura Wernet-Paskel, pasa den e cayanan di Santa Cruz y finalisa na veld di Sportboys. Un total di seis (6) scol a participa na e parada aki esta, Curason Contento Peuterschool, Sint Jan Kleuterschool, Colegio Laura – Wernet Paskel, De Schakel, Cacique Macuarima y Colegio San Hose. Tabata reina un bon ambiente y e alumnonan tabata gosa. Publico presente por a disfruta di e jump up yena cu creatividad y hopi ambiente. Minister Endy Croes ta felicita Colegio Laura Wernet – Paskel cu nan 45 Jump Up Escolar. Tambe, mandatario di Enseñansa y Deporte ta manda palabra di pabien na tur alumno, maestro y mayor di e scolnan cu a participa den e exitoso jump up. Por ultimo, Minister Endy Croes ta gradici e scolnan, comision organisado, boluntario y tur esnan cu a contribui pa haci e parada aki posibel. Danki pa engrandece Aruba su Carnaval 70. Minister Endy Croes ta desea Aruba un dushi temporada di Carnaval 70. Ban celebr’e conscientemente!