Calabas/Kudawecha – Shonnan amante di bon domino, Team Snor tin tur intencion di sigui aña 2024 cu solamente victoria tras di victoria! E ekipo di e flamante “Snor” Perez, bou guia strategico di Captain Magda, e biaha aki kier habri su buki di teoria di domino riba e ekipo cu ta ‘dakloos’, ‘homeless’, e team cu ta ‘hang out’ bou dje kwihi, esta nada menos cu Team Bou Palo Boys!

Diasabra awor, 17 di februari, cuminsando pa 8’or di anochi, lamper cu strena lo corta aya n’e unico y mundialmente famoso Domino Square Garden na Kudawecha, ora e dos chubato nan aki dal cabes contra otro! Aña ta habri Bou Palo Boys cu sed pa venganza y come back! Nan bista ta riba nan rival cu a laga nan palo di kwihi sin un blaachi biaha pasa. Snor lo por wanta e presion sin bula un valve? Shonnan, e contesta ta diasabra awor 8’or na Domino Square Garden! Manera semper, entrada pa pueblo ta totalmente gratis y e snacknan durante halftime lo lora completamente por nada. Djis yega!