ORANJESTAD: Dia 21 di februari ultimo, FAVI a celebra nan 50 aniversario sirbiendo comunidad di Aruba. Manera ta conoci, FAVI ta un organisacion cu ta brinda sosten, guia y herment necesario na personanan visualmente incapacita pa nan por sigui funciona den nos comunidad. E mision di FAVI ta pa guia hende di tur edad cu ta incapacita visualmente pa yega na nan meta di un bida feliz. E intencion ta pa saca nan for di isolacion y trece alegria den nan bida. FAVI tin clientenan cu a nace ciego, esnan cu a bira ciego y/of cu tin limitacion visual. Den un esfera ameno den e ballroom di Hyatt Airport Place a conmemora mita siglo di existencia di FAVI. E mainta special aki a conta cu presencia di Gobernador di Aruba Su Excelencia Alfonso Boekhoudt, Minister Endy Croes, Minister Dangui Oduber, Minister Ursell Arends, directiva, cliente y demas invitadonan special. E ceremonia tabata hopi emocionante cu diferente testimonio impresionante. Ademas di esaki, a honra y gradici e fundadonan, directivanan anterior y directiva nobo di FAVI. E clientenan di FAVI a deleita esnan presente cu un excelente presentacion cantando y tocando guitara. Esaki sigur ta demostra cu e trabounan di FAVI ta e compromiso pa sigura cu cada individuo sin importa su impedimento visual, tin e oportunidad pa persigui nan soñonan. Tambe, esnan presente a ricibi bendicion di Pastoor Gilbert Martis. E mainta special a clausura cu desvelo di e logo nobo. Por ultimo, Minister Endy Croes ta gradici e trahadonan di FAVI pa nan excelente trabou cu nan ta haciendo pa asina contribui na mehora bida di esnan cu limitacion visual. “Di curason masha danki pa boso bunita trabou”, Minister Endy Croes a finalisa.