ORANJESTAD: Diahuebs mainta, Minister Endy Croes a bishita scol basico Colegio Santa Famia na Pos Chiquito den cuadro di nos dia nacional. Cu hopi alegria y entusiasmo e alumnonan tabata en espera di e dignatario. Na yegada cabesante di scol Sr. Sigfried Kelly, staf, alumno – y maestronan a duna e mandatario un bunita y caluroso bonbini. Sigui pa presentacion di un baile cultural presenta pa e alumnonan di klas 5. Pa duna inicio oficial na e mainta festivo e alumnonan a canta nos himno Aruba, Dushi Tera y a hisa nos bandera. Minister Endy Croes a hiba palabra, unda cu el a conta un poco di e historia di nos himno y bandera pa asina inculca e amor patria y e importancia di e celebracion den nos muchanan. Despues di esaki, Minister Endy Croes a bishita e klasnan unda cu diferente instancia a duna presentacion di, entre otro, historia di Aruba, economia circular, agricultura, cah’i orgel y weganan tipico pa asina educa e muchanan di e tradicion di nos pais.

Sr. Sigfried Kelly, kende ta cabesante di e scol a expresa di ta contento y agradecido cu bishita di Minister Endy Croes na Colegio Santa Famia. E alumno – y maestronan a prepara un dia hopi special pa celebra 18 di maart. Un carousel di informacion na unda cu diferente instancia a duna presentacion di e historia y herencia di Aruba y e temanan cu ta di vital importancia di nos pais. E meta di e proyecto aki ta pa engrandece e balornan di nos isla. Na final di e bishita, Minister Endy Croes a ricibi un bunita obra di man titula: Timon di Enseñansa, traha pa e hoben Amanda Ospina Chacón.

Por ultimo, Minister Endy Croes ta gradici e scol pa un mainta ameno y ta felicita nan cu un bunita programa. Alabes e mandatario ta invita Pueblo di Aruba pa hunto ban celebra e Dia di Himno y Bandera en grande.