ORANJESTAD – Recientemente e team di Wings of Hope (WOH) cu ta forma parti di Aruba
Airport Authority N.V. a organisa e di dos AUA Airport Runway Run riba diadomingo 17 di maart
2024, caminda un total di 125 coredo a duna bek na comunidad di un manera inolvidabel.
Den presencia di tur coredo y boluntario, e team di Wings of Hope simbolicamente a haci un
donacion di 7.500 florin pa dos fundacion, esta Trampolin pa Trabao y Funari. Trampolin pa
Trabou su meta ta pa haya un trabou pa esnan di 17 aña bay ariba y cu tin un limitacion, door di
ofrece nan un capacitacion laboral y “match” nan cliente cu e dunadonan di trabou local cu miho
ta complementa nan potencial. Funari ta enfoca riba e integracion social di e personanan cu un
limitacion fisico den sociedad pa medio di mantene nan curpa y mente activo.
Pa e di dos edicion di AUA Airport Runway Run, tur 125 coredo a core un poco mas cu 5K
cuminsando desde Runway 11 pa Runway 29 y djey bek pa Runway 11 pa asina yega final. Tur
coredo a ricibi diferente gadgets di AUA manera Safety Vest y un Hydration Belt Waist Bag pa
haci uzo di dje durante e coremento. Pa finalisa cu e evento, a warda tur coredo na e final cu bebida
pa refresca incluyendo coco cu e logo nobo di Wings of Hope. A rifa un total di 32 premio entre e
participantenan, e premionan tabata inclui producto electronico, material pa haci deporte, voucher
pa salud y bienestar, voucher pa biahe y voucher pa haci trabou den hardin y mucho mas.
Pa honra Wings of Hope su esfuersonan pa ehecuta e proyectonan social cu tin un impacto positivo
pa comunidad di Aruba, Wings of Hope a lansa su logo nobo cu ta nifica resilencia, compasion y
progreso. Di e manera aki ta demostra un promesa pa construi un miho futuro, caminda cada
persona tin acceso na cuminda, educacion y oportunidad pa crece guia pa e Sustainable
Development Goals di Nacionnan Uni. Wings of Hope lo sigui curasha e comunidadnan y inspira
e futuro generacionnan.
AAA y WoH ta sumamente agradecido cu tur voluntario, coredo, organisacion y e demas gruponan
cu a participa den e di dos edicion di AUA Airport Runway Run p’asina haci e actividad aki uno
exitoso y inolvidabel.
Tocante AUA Airport
AUA Airport ta un di e aeropuertonan mas ocupa den region Caribe cu mas di 26 diferente
aerolinea operando pa Aruba contribuyendo na mas cu 2.8 miyon pasahero pa aña y cu buelonan
pa 31 diferente ciudad 45 diferente destinacion non-stop rond di mundo. Di e mercadonan cu AUA
Airport ta sirbi 77% ta for di Merca y Canada, 15% for di Latino America, 4% for di Europa y 4%
for di Antia Hulandes te cu luna di januari 2024. AUA Airport ta reconoce cu esaki ta danki na e
economia stabiel, clima politico, hospitalidad, populacion diversifica y siguridad general di nos
isla. AUA Airport su aspiracion ta pa bira un aeropuerto sostenibel, sigur y a prueba di futuro, den
region Latino Americano & Caribense, brindando un luga di trabou confiabel, facilidad di un
aeropuerto moderno y un servicio excelente cu ta e refleha hospitalidad Arubiano, contribuyendo
na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta
cu AUA Airport riba Twitter.com/Aruba_Airport, Facebook.com/ArubaAirport,
Instagram.com/arubaairport
Fecha: 20 di Maart, 2024
