ORANJESTAD: Recientemente, Minister Endy Croes a reuni cu e president nobo di Amateur Baseball Bond Aruba (ABBA) Sr. Kevin James y Sra. Jennifer Martes, kende ta miembro di directiva di ABBA.  Durante e encuentro, Sr. James a presenta e plan y vision moderno p’e disciplina di baseball den su totalidad. Lo trece un structura nobo pa e ekiponan hubenil y e otro liganan. Un otro cambio ta cu e aña aki e ekiponan den AA lo hunga 30 wega pa aña en bes di 10 wega. E campeonato di baseball ta inicia den luna di mei proximo. Ademas di esaki, a trata e Kingdom Series 2024 cu ta tuma luga na Aruba den luna di october. Un siman di baseball unda cu e Seleccion di Hulanda lo hunga tres (3) wega na Aruba prome cu nan sali pa Mexico pa competi den Premier 12 di WBSC. Pa finalisa, Minister Endy Croes a indica cu e tabata un bon reunion y ta sinti e biento fresco y nobo suplando den ABBA. “Tin proyectonan grandi na caminda y ABBA por conta cu sosten di Gobierno di Aruba” Minister Endy Croes a finalisa.