ORANJESTAD (12 di april 2024) – For di dia 26 di maart ultimo, Wendy’s Aruba a lansa oficialmente un programa nobo yama Wendy’s Care. E idea su tras ta pa crea un manera den cual Wendy’s Aruba, hunto cu e ayudo di pueblo di Aruba, por aporta na fundacion local cu ta haci un trabou na bienestar di nos comunidad.

Clientenan por a tuma nota cu ora di bishita Wendy’s e cahera ta puntra si ta desea di haci un donacion di 1 florin na beneficio di muchanan special. E florin ey ta bay den su totalidad ydirectamente pa Brighter Future Academy Foundation. E fondo lo yuda nan sigui traha pa brinda educacion y terapia na muchanan cu autismo, ADHD/ADD, sindrome di Down y cu retraso di desaroyo, entre otro.

Brighter Future Academy Fondation ta existi desde 22 di september 2022 cu e vision pa mehora e calidad di bida di mucha special y nan famia. Tambe ta enfoca den yuda e studiantenan alcansa nan capacidad completo y provee un luga sigur cu un ambiente agradabel caminda nan ta sinti motiva.

E colaboracion entre Wendy’s Care y Brighter Future AcademyFoundation lo transcuri durante 2024 y e suma total lo ta entrega na fin di aña. Tur sucursal di Wendy’s riba e isla ta participando. Pa mas informacion tocante e fundacion beneficia, por acudi na nan website: www.bf-academy.com.

E programa Wendy’s Care ta bin pa complementa e aporte y esfuerso cu regularmente Wendy’s Aruba ta haci na diferente instancia caritativo y actividad deportivo riba nos isla. Di antemano Wendy’s Aruba ta gradici tur cu ta participa na e programa y asina duna un man na nos muchanan special.