Diadomingo anochi a drenta informe di un accidente cu hende herida na Sabana Basora, mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un accidente semi-frontal unda e chauffeur di un Honda Civic a bay banda robes di caminda y a bay dal riba un Nissan Cube. E impacto tabata asina fuerte cu ambos auto a bira y a haya basta daño y e chauffeur di e Nissan Cube a resulta herida. Na yegada di e ambulans nan a atende e victima y a transporte pa hospital. Polis a nota cu e chauffeur di e Honda ta burachi y a detene pa a core auto bao influencia y causa un accidente cu hende herida.