ORANJESTAD: Dialuna mainta, Minister di Enseñansa y Deporte Endy Croes hunto cu directora general di Colegio EPI Sra. Ankie Danker a elabora riba e asunto di e studiante cu a expresa su preocupacionnan encuanto enseñansa na Colegio EPI riba medionan social.

Despues di e suceso aki, Minister Endy Croes a acerca directora general Sra. Ankie Danker inmediatamente pa atende e caso aki. Minister Endy Croes a indica cu cada studiante ta importante.  “Nos ta scucha tur preocupacion y ta actua di biaha pa busca solucion y mehora locual ta necesario”, e mandatario di enseñansa a expresa.

Durante fin di siman, Sra. Danker a acerca e hoben pa scucha su preocupacionnan y ta atendiendo e asunto aki. A splica e studiante cu e falta un aña mas pa culmina su estudio na Colegio EPI y e tin bastante probabilidad di bay over. Sra. Danker a indica cu na e scol tin un structura di cuido, pues e studiantenan cu tin algun inkietud por acerca nan mentor, begeleidingscoordinator of unitmanager. Ademas, Sra. Danker a expresa cu nan deseo ta pa tur studiante cu inicia un estudio na Colegio EPI termina scol cu nan diploma den man. “Tin hopi trabou na Colegio EPI y tin hopi aspecto pa mehora, pero nos ta trahando duro riba esakinan”, Sra. Danker a expresa. “Ta haci un peticion na tur studiante di Colegio EPI cu tin pregunta of algun preocupacion pa acerca nan mentor, begeleidingscoordinator y/of unitmanager pa atende nan caso debidamente. Papiando hunto ta logra”, Sra. Danker a indica.

Finalmente, e mandatario di Enseñansa ta stimula tur studiante pa termina nan estudio y pa esnan cu tin un inkietud pa acerca e personanan concerni na nan scol pa atende cu e asunto aki. Colegio EPI ta un scol hopi grandi cu alrededor di 1600 studiante y ta desea di yuda tur studiante pa por logra haal nan diploma exitosamente. Minister Endy Croes ta gradici Sra. Ankie Danker cu a atende e asunto aki inmediatamente y ta desea tur studiante di Colegio EPI hopi exito cu nan estudio.