MACUARIMA, ARUBA: Aruba un biaha mas tabata anfitrion pa un traning pisa pa recluta miembronan nobo pa e Team di Aresto. Team di Aresto ta considera un team profesional cu ta infoca riba diferente area pero un di e areanan importante ta pa pone man riba  sospechoso cu ta considera peligroso.

 

Ta pesey a yega e momento un biaha mas pa recluta mas miembro nobo pa e Team elite aki. Ta pesey comunidad di Aruba por a mira y biba diferente acontecimento riba nos pais e ultimo lunanan aki. Tur esaki tin di haber pa mira e calidad y habilidad di cada cursista cu a participa den e training aki.

 

E training aki ta den cooperacion cu tur pais den Reino Hulandes esta Hulanda, Aruba, Corsou, Boneiro y Sint-Maarten. Tambe a conta cu sosten di Polis profesional for di cada Pais den Reino pa ayuda den e entrenamento pisa aki.

 

E training aki tabata bou guia di Team di Aresto di Aruba conhuntamente cu tur coleganan di Reino Hulandes cu a yuda prepara e training na Aruba. Nos ta yama danki pa e team di DSI Hulanda y Mareniers Kazerne pa nan sosten y apoyo.

 

“Mi ta sumamente orguyoso di  e coleganan nobo di Team di Aresto cu a ricibi nan baret blauw. E opleiding aki tabata posibel dor di traha hunto cu e cuerponan di reino, college korpschef, DSI Hulanda y Mareniers Kazerne. E miembro nobonan aki ta di calidad halto den nos regio” tabata palabranan di altcomisario Ramon Arnhem.