Diasabra madruga  net ora guardianan di C.E.A. cu ta encarga cu transporta detenidonan ta nota un pelea grandi tumando lugar na e rotonde banda di Acero na Tanki Leendert, mesora nan a dal nan lusnan blauw sende y ta mira hobennan split for di otro drenta mondi etc etc. Ora a mira bon a mira cu tin 2 persona mal bati un riba e rotonde y otro banda di caminda. E grupo aki tabata basta grandi y nan tabata golpiando e 2 hobennan aki ferozmente. Nan a pidi ambulans pa ambos victima. Mirando cu e agresornan a bandona e sitio polis lo bay observa e camaranan di vigilancia pa asina saca afor kendenan ta esnan cu a participa den e agression aki.