MINISTER DI CULTURA A REUNI CU E HOBENNAN TALENTOSO DI E PELICULA ‘PATROON’

Oranjestad – Minister Xiomara Maduro a reuni cu tres hoben talentoso Mario Gonsalves, Valentino Angela y Aldair Pieters di e pelicula ‘Patroon’. E hobennan aki a bini Aruba riba invitacion di Ministerio di Cultura, Ministerio di Turismo y ATA pa bin presenta e ‘short film’ ‘Patroon’ na Aruba.

Durante di e encuentro e hobennan a conta tocante di e pelicula ‘Patroon’ y tambe e tema di e pelicula. E hoben director di pelicula Mario a splica cu e ta traha cine basa riba temanan cultural social. E ‘short film’ ‘Patroon’ a wordo traha como un ‘afstudeeropdracht’ di Mario durante cual ela acerca Valentino pa ta e director asistente y Aldair como e actor principal. E proyecto aki a wordo financia door di ATA y cu crowdfunding/donacion di varios ciudadano di Aruba. Esaki ta algo bunita ya cu nos hendenan mes a yuda e hoben studiante aki haci su proyecto bira realidad. ‘Patroon’ tambe a gana e premio di ‘Beste afstudeer Project’ di Gemeente Utrecht den e categoria ‘Artistieke Presentatie’.

Diahuebs e hobennan a tene un presentacion na Cas di Cultura durante ‘Art Talk.’ Diabierna lo tin un presentacion di ‘Patroon’ na Crystal Theater na Renaissance Hotel pa tur esnan cu a registra online.

E mandatario subraya cu e ta contento di mira e hobennan creativo cu ta desplega nan talento den e mundo cinematografico internacionalmente. Pesey  Ministerio di Cultura hunto cu Ministerio di Turismo y ATA hunto a aporta pa e hobennan aki por bini Aruba pa asina por mustra nan bunita obra na nan Pais Aruba. E dignatario a enfatisa cu e hobennan dinamico aki ta un inspiracion y motivacion pa nos hobennan local. Alabes nan ta un bon ehempel pa ‘Creative Industry’ cu ta un di e seis sectornan prometedor pa diversificacion di Aruba su economia.

Pa Minister Maduro e tabata un placer di a reuni cu e hobennan dinamico aki y scucha nan conta di nan experiencia y nan plannan pa futuro, y ta desea nan hopi exito cu e presentacion di e pelicula na Aruba.

Share:

Leave a Reply

Your email address will not be published. Required fields are marked *