ORANJESTAD – WEB Aruba N.V. ta informa cu den cuadro di e proyecto pa construccion y instalacion di un tanki di awa pa Alto Vista, e siman aki a marca e centro di e tanki pa asina e preparacionnan final pa e instalacion di e vloer di staal por tuma luga.

Na luna di november di aña 2022 a cuminsa cu e trabaonan di desmantelacion di e tanki di awa bieu. Fin di 2024 y comienso di 2025 a evalua solucionnan mas duradero pa e vloer, sea di concrete of di staal y finalmente a escoge pa un vloer di staal. E proyecto aki ta forma parti di “Upgrade Aruba Water Distribution Network” cu ta un proyecto mas grandi y integral cu ta encera construccion, instalacion di tanki nobo, cambio di pomp y tuberianan tur rond di nos isla.

Pa WEB e inversion den un tanki nobo pa Alto Vista ta uno strategico y esencial.

E tanki nobo lo tin un capacidad di 18800 m3 (6200 m3 mas cu esun bieu). E lo garantisa un suministro di awa stabiel pa e demanda grandi cu tin den e area di Noord. Manera ta conoci e districto di Noord a bira e area mas pobla di nos isla, caminda a tuma lugar hopi desaroyo; tanto residencial, turistico y comercial.

E tanki nobo lo bay percura pa mas capacidad, calidad, stabilidad y durabilidad pa suministro di awa. Ta calcula cu dentro di 6 luna e trabaonan na tanki Alto Vista lo keda completa. Nos ta manda un palabra di gradicimento na tur habitante di e barionan concerni y stakeholdernan pa e cooperacion y pa nan pasenshi durante e periodo di construccion y instalacion.

09 mei 2025​​​​                  ​                 ​          WATER- EN ENERGIEBEDRIJF (W.E.B.) ARUBA  N.V