Oranjestad, 11 di maart 2020 – Dia Internacional di Hende Muher a wordo celebra en grandi durante e conferencia di hende muher. Mundialmente ta celebra 8 di maart pa duna reconocemento na hende muher pa nan logronan den tur aspecto.
Igualdad pa nos tur tabata e tema trata durante e mainta di e conferencia caminda diferente orador a haña e oportunidad pa papia riba e tema aki. E tema aki a wordo treci pa asina nos tur por traha hunto pa logra igualdad den tur sentido di bida. Pa logra esaki tur ser femenino y masculino mester ta envolvi den e trayecto aki.
Executive Director di e banco comercial mas grandi di Aruba, Sra. Gina Habibe-Arendsz a forma parti di e “Business Panel” dirigi pa Amy Richards durante di e diadomingo mainta. El a trece dilanti diferente punto riba e topico di leadership y con ta balansa esaki cu bida diario. E importancia di traha den equipo y pa tin un educacion continuo, tanto di cas y profesional. Esaki ta importante pa desaroyo di e individuo y tambe e organización y equipo cu bo ta forma parti di dje. Gina a trece padilanti con e ta stimula y a wordo stimula (coached) pa por a yega unda ela yega den su funcion.
E conferencia a conta cu un panel di hende muhernan lider den nan trabou y den nos comunidad. Renaissance Convention Center a conta cu un cantidad di cerca di 800 persona. Aruba Bank ta contento di por contribui na un conferencia exitoso y cu ta crece durante di e ultimo 3 aña, y mas importante aun pa crea un plataforma pa hende muher comparti nan experiencia y motiva otro.
