WILLEMSTAD, Kòrsou – Awe, djamars 17 di yüni 2025, e frakshon di Partido Nashonal di Pueblo (PNP) a demostrá su determinashon ku ròl
krusial den e reunion públiko di parlamento tokante e “Ontwerplandsverordening houdende vaststelling van de Jaarrekening
van Curaçao voor het dienstjaar 2019”. Apesar di no tabata den Gobièrnu ni Parlamento na 2019, PNP a para firmemente pa e derechi fundamental di nos pueblo riba transparensia i bon gobernashon finansiero riba sodó i plaka di nos hendenan.

Parlamentario Sheldry Osepa a habri e skrutinio di PNP ku preguntanan agudo, pa rekonosé ku “e bista finansiero awe ta total diferente.” El a
enfatisá ora a start e debate: ‘Kiko nos ta bai hasi awe? Kiko ta e kosnan ku nos tin ku bai traha riba dje!’ Osepa a insistí ku “e relatonan anual
mester dunabo un bista korekto. Relato anual mester ta na tempu, esei ta demostrá rèspèt pa e pagadónan di belasting.” “Mester tin un bista bon di nos kuenta finansiero.” Su reto na e Minister di Finansa tabata direkto:
“Kiko nos ta bai hasi pa evitá ku despues tin ku pasa relatonan anual ku no ta duna bista real di e situashon? Dikon lo bo laga baka bira bai, pabo
tira su sushi ku piedra? Minister a bisa den Parlamento di tur e kosnan ku a bai róbes, ta algu ku mester a keda ‘vastgesteld’ promé e la yega
Parlamento. Raad van Minister a aprobá e kuenta anual di 2019, ku tur e kosnan róbes ku Minister di Finansa ta papia riba dje? Ta kiko
Parlamento lo mester hasi?” Osepa a enfatisá.

Siguiendo den e pasonan pa PNP, Lider di Frakshon, Ruthmilda Larmonie-Cecilia, a hiba un disertashon profundisando ku preguntanan
pa klaridat, alabes kondenando e retrasonan grave i prolongá di e kuentanan anual. “Esaki no ta un simpel detaye atministrativo; esaki ta un
violashon struktural di prinsipio di bon gobernashon, transparensia i rendishon di kuenta na pais,” Larmonie-Cecilia a deklará. El a pidi klaridat
sin bira rònt, enfatisando e inhustisia di e retraso di sinku (5) aña pa aprobá e kuenta anual di 2019: “Kon nos, komo órgano legislativo por
tuma desishon riba presupuesto i kontrolá e uzo di fondo públiko, si nos no tin klaridat básiko riba kiko a pasa ku sèn públiko, te ku 5 aña pasá?”

Larmonie-Cecilia a konfrontá e Minister ku preguntanan fundamental:
• Kiko ta e rasón pa e retraso di 2019, i kiko ta e plan konkreto pa normalisá e sobrá kuentanan anual di 2020 te ku 2023?
• E echo ku no ta presentá e kuentanan anual na tempu ta mina e derechi presupuestario di nos parlamento?
• Ki medida e gobièrnu lo tuma pa rekonstruí konfiansa i garantisá transparensia struktural di nos situashon finansiero di Kòrsou?

Ademas, PNP a puntra e Minister kiko e ta spera di Parlamento, mas aún ora e mes rekonosé ku e kuenta anual di 2019 ta mustra “un maneho
desastroso kontra di lei”. Kon Parlamento por aprobá un kuenta anual ku e Minister mes ta deskribí di tal forma? Lider di Frakshon di PNP a puntra, mientras e la pidi tambe pa kiko lo ta e konsekuensianan pa Parlamento di tantu aprobá komo no aprobá un kuenta anual asinaki.

Finalmente, Parlamentario Ruisandro Cijntje, a re-enfatisá e nesesidat pa karga responsabilidat: “Mester pone hende responsabel den e pais
akí, pa mustra e pais unda nos ta bai pe siguiente generashon!” Cijntje a deklará desidido pa hasi personanan ‘accountable’ ora loke e ta konsiderá
kriménnan asinaki tuma lugá kontra regla di kontabilidat mirando e mal uzo di “miones i biones.” E la insistí: “Ta nos su responsabilidat di awor
pa garantisá futuro!” El a hasi un yamada na bon maneho: “Kiko nos ta bai hasi pa e prosesonan aki kore segun regla i proseduranan den pais
akí?” Tambe e la indiká e esfuersonan di PNP den pasado ku awe por bisa ta kondusí na un sùrplùs den finansa públiko.

E frakshon di PNP a sali for di e reunion ku a keda di skòrs te próksimo aviso ku un mensahe kla: E pueblo di Kòrsou meresé un gobièrnu ku ta
manehá su finansa públiko ku integridat i transparensia total. PNP lo sigui lucha pa e derechi sagrado di nos pueblo pa sa kiko ta pasando ku nan
plaka, i lo perkurá pa esnan ku a viola e reglanan semper keda hasí responsabel asta si e ta di nos mes. E lucha pa bon gobernashon semper
mester kontinuá!

Frakshon di Partido Nashonal di Pueblo (PNP)