Calabas/Kudawecha – Diasabra awo, 28 di juni, e centro di pega piedra, e
mundialmente famoso Domino Square Garden, un biaha mas lo ta e epicentro di otro
temblor den mundo di domino! E ekipo di Alto Vista, esta Bou Palo Boys di ‘High View’,
a challenge Nelson “Snor” Perez su ekipo pa midi forsa e fin di siman aki. Mas cu claro,
Team Snor no ta riña pa niun team y a acepta e reto di biaha!
Papiando di reto, na mesa di redaccion a yega un vroem-vroem di un caso straño di
“schoenmaker blijf bij je leest” cu a pasa n’un conocido restaurant crioyo den curason di
Tanki Leendert. E hungadonan cu ta frecuenta e restaurant cu ta carga e mesun
nomber cu su doño, a dicidi di challenge Team Snor p’un wega di domino, cual wega a
tuma lugar diasabra ultimo n’e restaurant aki, cual su nomber ta caba cu “Place”. Wel,
manera nan ta bisa na Ingles: “Guys, don’t quit you dayjob”! E ekipo di Snor den un
frega di wowo a pone su contrincante “in their place”! Vap vap Team Snor a pone tur na
nan luga cu score aplastante di 21 – 10! Un “slam dunk” cu lo keda resona pa basta
tempo tras dje bar dje establecimento!
Mientras tanto shonnan, Team Snor ta rumbo pa enfrenta otro desafio, e biaha aki dje
trabuconan cu ta train bou dje palonan ay na Alto Vista! Diasabra proximo, 28 di juni,
cuminsando pa 8’or en punto, e trabuconan lo baha foi patras di tanki di Alto Vista pa
bin mustra Team Snor es un ke otro den domino! Manera ta custumber, entrada ta
completamente gratis pa pueblo en general, y durante halftime e pasapalonan lo lora
totalmente por nada. Bini un bini tur pa presencia e estreno dje ekipo di Alto Vista!
Yega!