Den su esfuerso continuo pa garantisa un suministro di awa sigur, confiabel y di calidad halto, WEB ta realisa mantencion periodico di su tankinan di awa. Awor ta na turno e tanki di Sero Preto, cu tin un capacidad di 6.000 meter cubico. E tanki aki ta un punto crucial pa suministro di awa na e districto di San Nicolas, Seroe Colorado y vecindario. E mantenemento regular ta necesario pa prolonga bida di e tanki, pa preveni fayo den structura, y mas importante ainda, pa sigura cu e awa cu ta wordo almacena y distribui, ta keda den un estado apto pa consumo humano. E trabou di mantenemento lo inclui inspeccion tecnico externo, reparacion structural si necesario, y aplicacion di material pa preveni corosion. Despues di mantencion di tanki Sero Preto, e siguiente tanki cu ta programa pa mantenemento ta Tanki Mondi Fierno.