Tur luna Horacio Oduber Hospital (HOH) ta elogia un colega cu di un forma of otro ta destaca y pa luna di november 2025 a toca turno na Victor Gomez. Victor ta un tecnico di e aparatonan medico y ta forma parti ya pa mas di 17 aña caba di e team tecnico di HOH. Ora ela drenta un reunion importante ela ripara cu no ta pa reunion ela yega. Un sorpresa grandi pa Victor ora cu ela topa cu famia y un sala yena di coleganan, management y representante di Hunta di Directiva. Un momento festivo unda cu bunita palabranan no a falta y sigur e lo hiba cune pa semper.

 

Victor su nominacion a wordo entrega door di su team a base di e balornan di TRUSTED di Hospital.  Victor ta un excelente ‘teamplayer’ cu ta contribui activamente na un ambiente positivo di trabou. E ta yuda su coleganan te unda cu e por y ta purba mehora e eficiencia den departamento pa asina procesonan tecnico cana miho y sin problema. E no ta huzga otro, ta scucha preocupacionnan y ideanan di otro colega, ta comunica di un manera habri, cu respet y su feedback ta semper constructivo.

 

Victor su conocemento tecnico y manera di soluciona problema ta impresionante. Sea ta trata di mantencion, fayo of reparacionnan complica, aparatonan mester traha bon sin problema. Y tambe segun exigencianan stipula pa fabricante y certifica, pa asina por duna e servicio di calidad cu tin mester na nos pashentnan. Por pensa riba aparatonan medico cu ta uza na camber di opepracion, radiologia, endoscopia, functie, laboratorio y hopi mas. Victor semper ta entrega trabou di calidad halto. E ta traha diligente, eficiente y cu’n actitud professional cu ta duna confiansa den su experticio. E ta dedica na su trabou y na Hospital: Victor ta involucra su mes activamente pa procesonan di mehoracion y inovacion riba su departamento cu na final tin un influencia positivo riba su departamento pero tambe indirecto na pashent y Hospital completo.

 

Victor ta un persona cu gusta su trabou y ta super motiva y alabes ta trece ambiente na su team. Ela demostra su balor pa hospital y merece e bunita titulo di ta empleado di luna. Hunta di directiva y team completo di HOH ta felicita Victor pa e bunita reconocemento como empleado di luna di november 2025. Masha pabien Victor!