Dialuna dia 8 di december, Aruba Tourism Authority (A.T.A.) conhuntamente cu Aruba Ports Authority NV (APA NV) a yama bonbini na MS Renaissance durante su bishita inaugural na Aruba bou di su nomber nobo. Aunke esaki ta marca su prome bishita oficial como MS Renaissance, e no ta prome biaha e barco mes ta bishitando nos isla. E barco tabata nabega bou di e nomber MS Maasdam cu ta parti di Holland America Line. E barco a bishita Aruba pa prome biaha den 1993 y a sigui regresa pa decadanan.

MS Renaissance a yega completamente decora cu tema di Pasco, agregando un ambiente festivo pa huespednan, tripulante y representantenan local. Awor bou di operacion di Ambassador Cruise Line, MS Renaissance a yega cu 1.017 pasahero y 502 tripulante, ofreciendo un experiencia di crucero clasico y mas priva. E biahe aki ta consisti principalmente di huesped cu tin mas cu 50 aña. Un gran parti di huesped ta bini for di Hulanda y Reino Uni, via un colaboracion cu Corendon.

Un punto importante di su despliegue regional ta su modelo di embarcacion flexibel, cu ta permiti huespednan cuminsa su crucero for di tres isla Caribense. E prome ta Bridgetown, Barbados, sigui pa Willemstad, Curacao, y e di tres isla cual ta Basse-Terre, Guadeloupe.

Pa honra e bishita inaugural, un ceremonia di intercambio di plakkaat a tuma lugar abordo di e barco. E tradicion maritimo aki ta simbolisa colaboracion y fortalecemento di laso entre e compania di crucero y e destino. Representando APA NV na e ceremonia tabata Mario Arends, Chief Commercial Officer, conhuntamente cu Monica Bos, Cruise Manager, di A.T.A., y Maureen Palm representando agencia di waf Maduro & Sons. Capitan Simon, un lider maritimo cu tin hopi experiencia y cu a bishita Aruba durante decadanan, tambe tabata presente na e ceremonia.

Aruba ta spera di por sigui yama bonbini na MS Renaissance pa mas bishita den futuro, continuando un relacion maritimo cu a cuminsa mas cu 30 aña pasa y cu awor lo continua bou di un nomber nobo.