ORANJESTAD- Minister di Labor mr. Wendrik Cicilia conhuntamente cu Departamento di Labor
y Investigacion (DAO) ta anuncia introduccion di un salario minimo pa ora entrante 1 di januari
2026.
E cambionan principal den e ley di salario minimo
– Dia 1 di september 2025, den Parlamento di Aruba a aproba unanimamente e cambionan den e ley di
salario minimo pa asina introduci un salario minimo pa ora. Entrante 1 di januari 2026 ta bira obligatorio
cu tur empleado di 18 aña of mas, cu ta gana e salario minimo, mester gana por lo menos e salario
minimo pa ora sin importa e cantidad di ora cu ta traha. E salario minimo pa ora entrante 1 januari
2026 ta bira e suma di Afl. 11,58. E cambio aki ta encera tambe cu tur empleado cu ta traha menos cu 40
ora pa siman (p.e. 5 ora pa siman) tin cu wordo paga e suma di Afl. 11,58 pa ora.
– Tambe a aproba pa haci un coreccion den e calculacion di un salario minimo pa luna. Entrante 1 di
januari 2026 lo uza factor 4,333 (antes tabata 4,28) pa haci e calculacion. Factor 4,333 ta e resultado di 52
siman total den un aña dividi door di 12 luna cu ta bira 52/12 = 4,333.
– Posicion di e empleadonan domestico ta bira mas cla. Pa e empleado domestico cu ta biba cerca su
dunado di trabou ta conta un salario minimo di Afl. 5,35 pa ora pa motibo cu e dunado di trabou ta cubri e
extra gastonan di biba den forma di alohamento y cuminda di e empleado. Pa tur otro empleado domestico
cu no ta biba cerca su dunado di trabou e salario minimo di Afl.11,58 pa ora ta aplicabel.
Con ta calcula e salario minimo pa siman of pa luna?
Pa calcula e salario minimo pa siman lo uza e siguiente formula:
Salario pa siman = cantidad di oranan di trabou pa siman x salario minimo pa ora.
Pa calcula e salario minimo pa luna lo uza e siguiente formula:
Salario pa luna = cantidad di oranan di trabou pa siman x salario minimo pa ora x factor 4,333
Pa mas informacion riba e introduccion di salario mínimo pa ora
 Bishita website di DAO: www.daoaruba.com Tin un documento Frequently Asked Questions
(FAQ) riba e salario minimo pa ora disponibel den diferente idioma;
 Por email na : dao.uurloon@gmail.com
 Por yama na tel: 5237720, email directiearbeid@aruba.gov.aw of por bishita oficina di DAO situa
na Paardenbaaistraat 11 entre 7.30 am pa 12:00 pm y 1:00 pm pa 3:30 pm.