ORANJESTAD – Studiante di Ciencia Ambiental na Avans Hogeschool, Breda, Janelina Thijzen, a haci su pasantia na DNM di 1 di september 2025 pa fin di januari 2026. Como studiante di Ciencia Ambiental, den su ultimo fase di estudio, el a scoge DNM pa su pasantia; specificamente bou di guia di e departamento di investigacion y monitoreo di DNM.
Durante su pasantia e tabata envolvi y ocupa cu analisis y ampliacion di data ecologico. Specialmente riba matanan grandi y bieu cu por tin un balor ecologico importante pa Aruba. E proyecto “Midi Nos Matanan” ta un proyecto di ciencia cu participacion di ciudadanonan pa asina DNM haya mas informacion posibel di matanan grandi y bieu rond di Aruba.
E investigacion a concentra riba tres especie di palo di mata cu ta comun na Aruba:
- Kwihi (Prosopis juliflora) – 351 midimento
- Wayaca (Guaiacum officinale) – 216 midimento
- Watapana (Caesalpinia coriaria) – 202 midimento
A midi 769 palo di mata di e tres especie aki. Pa haya e palo di mata mas grandi, e team a bay hunto cu e studiante rond di nos isla y hasta a pidi permiso na casnan unda tin palonan grandi den hofi, pa asina midi. Uzando calculacion estadistico, e studiante a determina cua palonan tin troncon excepcionalmente diki. A uza dos manera di clasificacion:
- Clasificacion amplio: 81 palo
- Clasificacion estricto: 21 palo
Entre e palonan mas impresionante tin, por ehempel, un Wayaca di 644 cm na Windstraat, un otro Wayaca di 332 cm na Barcadera y un Watapana di 398 cm na Piedra Plat.
Segun stakeholdernan local, palonan monumental tin balor pa varios motibo:
- nan edad (bieu),
- nan importancia ecologico,
- nan nificacion historico of cultural,
- y nan rol den educacion y conscientisacion ambiental.
E resultado di e proyecto ta mustra cu Aruba tin varios palo di mata cu por considera como monumental, y cu tin potencial pa proteccion legal bou di e Ordenansa di Conservacion di Naturalesa, Articulo 4 y 10 (Natuurbeschermingsverordening). Dependiendo di e manera cu gobierno y instancianan relevante kier maneha e tema, entre 21 y 81 palo di mata por haya recomendacion pa proteccion y conservacion.
Esaki ta un bon ehempel con investigacion y colaboracion cu comunidad por contribui na un Aruba ta mas berde y sostenibel. DNM ta desea Janelina Thijzen hopi exito cu su estudio final y ta gradici’e pa su contribucion.
