E deporte di taekwondo sigur ta uno popular na Aruba y a mira den pasado varios atleta represente TEAMARU na diferente Weganan, manera atleta Maelynn Fradl cu aña pasa a competi na e Junior Panamerican Games ASU2025. Awor cu e IV Weganan Suramericano di Hubentud Panama2026 na porta, ta conta cu dos dama hoben pa represente Aruba den e disciplina di combate di Taekwondo, Kyrorugi.

E ekipo di Taekwondo cu lo bay e Weganan ta conta cu entrenadora Monica Pimentel, cu ademas di ta atleta Olimpico di Rio2016, ta e actual presidente di e Aruba Athletes Commission. Monica lo tin dos atleta pa Panama2026, unda Aleysha Macea y Steffanie van Geene lo experiencia nan prome Weganan di un Ciclo Olimpico. Ambos atleta tin amplio experiencia internacional, participando na diferente campeonatonan den nos region, y ta cla pa haci nan miho esfuerzo na Panama.

Comite Olimpico Arubano (COA) ta desea e ekipo di Monica, Aleysha y Steffanie hopi exito na e Weganan y ta sigur cu Aruba lo ta apoyando nos atletanan di Taekwondo na Panama2026.

#COA #ARUBA #TEAMARU #PANAMA2026