Calabas/Kudawecha – Diasabra awo, 4 di april, cuminsando pa 8:00 di anochi, lo tin un otro sambombaso di bataya di domino n’e palacio di pega piedra, e mundialmente famoso Domino Square Garden. Si shonnan, mientras otro ta preocupa cu cosnan mondaine, ainda tin esnan humilde cu ta worry cu e “common guy on the street” y ta zorg pa nan tambe tin algo pa pasa nan tempo n’un manera sano. Guynan manera style di Bou Palo, of esnan cu ta “teamless” y ta aglomera bou di un denominado comun manera “99”.

E fin di Semana Santa aki pues lo ta domina bou zonidonan di batimento di piedra aya net n’e grens entre Kudawecha y Calabas, net schuin dilanti dje palo di kwihi. Nada menos cu e trabuconan di Bou Palo Boys a cera cabes pa enfrenta e “sicarionan” di 99! Manera un y tur sa, lider di 99 no tin un team fiho, si no un lista di hitman cu a ta yama style di “Black Ops” pa presenta na mesa di domino y elimina nan  contrincante. Diasabra awor lo ta sumamente interesante pa wak kendenan lo presenta den fila di 99. Manera semper, entrada lo ta completamente gratis, y durante halftime, e pasapalonan lo skeiro rond totalmente “on the house”! Bini un bini tur wak si Bou Palo Boys lo ta “opgewassen” pa enfrenta e lista secreto di 99! Yega!