Cu bishita di UNRC, Aruba y Nacionnan Uni ta reforsa lasonan di cooperacion multilateral

ORANJESTAD – Di 11 pa 13 di mei 2026, e Coordinador Residente di Nacionnan Uni pa Trinidad & Tobago, Aruba, Corsou, Surinam y Sint Maarten, Sra. Joanna Kazana a realisa un bishita oficial na Aruba pa fortalece e cooperacion cu sistema di Nacionnan Uni. E bishita aki, coordina pa Directie Buitenlandse Betrekkingen (DBB), ta marca un momento strategico pa posiciona Aruba como un Small Island Developing State (SIDS).

Durante e dianan aki a enfoca riba temanan crucial pa SIDS manera acceso na financiamiento internacional, adaptacion na cambio di clima, diversificacion economico y desaroyo social. E meta tabata pa duna visibilidad na e prioridadnan di maneho di Aruba den e cuadro multilateral y determina e paso nan pa mas cooperacion den futuro.

E bishita ta specificamente di e oficina di e Coordinador Residente pa Nacionanan Uni, cu ta estableci na Trinidad & Tobago, y ta fungi como e punto central cu ta coordina tur e trabounan di desaroyo di UN pa islanan den Caribe, incluyendo Aruba, Corsou y Sint Maarten.

Continuacion di un dialogo importante

E bishita aki ta un continuacion y un paso logico despues di e combersacionnan cu ta bin ta tumando lugar for di basta tempo caba, y tambe ta sigui e bishita cu a tuma lugar na maart ultimo cu e representante di Reino na Nacionnan Uni. Durante e dianan ey, Aruba a pone puntonan hopi cla riba mesa tocante e retonan cu nos ta enfrenta como un isla chikito den desaroyo (Small Island Developing State – SIDS).

E temanan principal cu ta trata e siman aki entre otro ta:

• Financiamiento Internacional: Con Aruba por haya mihor acceso na fondonan internacional pa proyectonan di desaroyo.

• Migracion y Siguridad: Atende cu e retonan di fluho migratorio.

• Cambio di Clima: Proteccion di nos naturalesa y preparacion pa e efectonan di clima.

• Economia y Tecnologia: Diversifica nos economia y acelera e transformacion digital.

• Bienestar Social: Proyectonan cu ta yuda den e parti social di nos comunidad.

Actualmente tin un analisis profundo tumando lugar (Common Country Analysis) pa nan compronde mihor ainda na unda e prioridadnan di Aruba ta awe pa asina por pasa pa accion door di fortalese e cooperacion cu e agencia aki.

Pasonan concreto pa futuro

E bishita di e Coordinador Residente ta un momento clave pa pasa pa accion. E puntonan di discusion lo ta:

1. Duna feedback riba e peticionnan cu Aruba a haci anteriormente.

2. Splica na un manera structural con e sistema di UN por apoya e vision di e gobierno di Aruba.

3. Acorda accionnan concreto pa corto y mediano plaso cu ta beneficia e comunidad Arubiano basa ariba e analysis aki.

Cu e bishita aki, Aruba ta reafirma su posicion riba e plataforma mundial, sigurando cu tas scucha e bos di nos isla y cu nos ta saca e mihor probecho di e experticio y e sosten cu Nacionnan Uni ta ofrece.