Yoyo Power ta laga Calabas Blue Jays den tereno 7-5 mientras Salbabo ta aplasta Super Plus 20-8
Copa Noord 2026 organisa e aña aki pa Calabas Blue Jays dedica na (5) Baluarte Lea Tromp, Maria Boekhoudt, Aldrin Boekhoudt, Julieta (Jeta) de Cuba Lenin Ashby ta den ful swing cu varios weganan di nivel yena cu emocion fin di siman .
Copa Noord a inicia diabierna 22 di Mei
Desde 22 di Mei Copa Noord 2026 a inicia cu un bunita y colorido apertura riba ritmo di brassband na veld di Centro di Bario Noord. Himno a wordo canta den un forma masha bunita cu un toke special pa e hoben J-Vyon Besselink. Mesora weganan a inicia unda Royal Power Tat Fat den e prome wega ta derota y machika e muchanan di Kudawecha Redskins 12-5. Den e di dos wega hopi interesante e ekipo organisador di Copa Noord 2026 esta Calabas Blue Jays ta hunga su promer wega contra Palmbeach Yoyo Power un ekipo cu a estrena hungando pa prome biaha den Copa Noord. Riba un veld repleto di fanaticada Calabas Blue Jays ta pica ariba 2-0 den prome inning y ta amplia esaki cu 3 careda mas den di tres inning y ta anota un careda den di cuater inning. Yoyo Power ta corta ventaha den di dos inning anotando 2 careda y ta rally despues pa 4 careda den bom di 4 inning pa empata e wega 6-6. Den ultimo inning Yoyo Power ta score un careda pa laga Calabas Blue Jays den tereno 7-6 den un wega dramatico. Yoyo Power 7 careda, 13 hit, 3 error mientras Calabas Blue Jays 6 careda 10 hit, 2 error. Gutierrez Hernandes ta cubri henter e ruta y ta seya e victoria riba su nomber. Jomir Vrolijk cu basta dolor na curason ta bay cas cu e derota riba su nomber. Pa Yoyo Power a destaca na bate B.Rincones 4-2, J.Pire di 3-3, L.Diaz y H. Adrianza ambos di 3-2. Pa Calabas Blue Jays a luci na plato den causa perdi Joshua Ramada y Josmar Thiel ambos di 2-2, X.Jansen y Mark Danies a bay di 3-2 mientras E.Tromp a bay di 2-1. Fanaticada a gosa di un tremendo espectaculo.
Salbabo ta derota Super Plus 20-8
Den un otro wega valido pa Copa Noord 2026 e sub campeon di Copa Noord 2025 esta e ekipo di Salbabo e muchanan di Toto Gei a bin a la carga y ta fusile e ekipo di Super Plus cu score di 20-8. Salbabo 20 careda, 21 hit, 6 error. Super plus 8 careda, 8 hit, 9 error. Mester accentua 15 error den un wega sigur ta hopi. R.Henriquez a cubri henter e ruta poniendo e promer victoria riba su nomber. E veterano Johannes Poy Flanegin a purba wanta e wega usando su ultimo cartuchi pero mester conforma su mes cu e derota riba su nomber. Pa Salbabo a destaca na bate Toto Gei kende su bate tabata na candela y a bay di 4-4, Aigil Brete y Dos Santos ambos di 4-3, J.Zara a bay di 2-2, K.Flanegin di 4-2. Mihor bateadornan pa Super Plus a resulta Ray Bernabela di 2-2, Gill Wester y J.Baez a bay di 1-1, G.Lucas y J. Henriquez a bay di 2-1. Weganan di Copa Noord lo continua diabierna y diasabra awor riba veld di Centro di Bario Noord mientras Diadomingo weganan lo ta riba veld di Calabas Blue Jays. Copa Noord 2026 den pleno accion!
