Minister Ruiz-Maduro: CAFT a conseha Conseho di Minister di Reino pa duna Pais Aruba un ‘aanwijzing’

ORANJESTAD – Minister Ruiz-Maduro ta informa cu CAFT no ta satisfecho cu tur e trabounan cu Gabinete Wever-Croes ta haciendo. Apesar cu CAFT a duna un evaluacion positivo riba e cifranan di e di dos kwartaal di e aña aki, CAFT a conseha Conseho di Minister di Reino pa duna Pais Aruba un ‘aanwijzing’.

Protocol di november 2018

Desde aña 2010 Gobierno di Aruba a bin ta cera Protocol cu Hulanda den cual ta indica cu lo bay atende cu e finansa di nos Pais pa asina yega na un finansa publico manehabel. Den cuadro di esaki a cera un Protocol den 2013 den cual a indica cu si cumpli cu algun meta, Aruba lo por haya hasta placa fia via Hulanda na interes reduci, un ‘zachte lening.’ Ma e situacion financiero di Aruba desde 2010 a bira pio te cu na 2014, Hulanda a interveni via Gobernador pa no firma e presupuesto di Pais Aruba pa 2015. A dicidi di pone Aruba bou supervision financiero di CAFT y den e ley di CAFT a pone normanan pa deficit pa añanan 2015 te cu 2018. E situacion financiero di Aruba bou supervision no a drecha y a bira pio bou un redoblacion di nos debe nacional. Na momento di cambio den gobernacion a bin resulta cu e proyecto di refineria cu mester a produci entrada pa Pais Aruba, no a concretisa creando asina un deficit mas grandi y cune e hecho di no lo por cumpli cu e norma di deficit pa aña 2018 manera fiha den articulo 14 di e Ley di LAFT. Pa evita e menasa di un Decreto di Rey (KB) pa incumplimento cu e Ley di LAFT pa aña 2018, Gobierno mester a drenta den negosacion cu Hulanda pa por stipula otro norma y otro caminda con pa yega na un finanzas publico manehabel. Esaki a resulta den e Protocol di november 2018 cu ta cubri presupuesto 2019 te cu 2021.

Menasa KB

For di e cuentanan anual di Pais Aruba pa 2018 ta resulta cu Gobierno a cumpli cu e norma di deficit pa 2018 y a keda den margen di e apoderacion cu Parlamento a duna Gobierno pa por haci gasto. Pa 2019 te cu e di dos kwartaal, Gobierno ta cumpliendo cu e apoderacion di Parlamento. Riba e hecho aki CAFT a raporta positivamente. Pero locual CAFT ta keda cuestiona y ta pidi cambio di presupuesto pe ta e fondo di Crisis Social (SCP). Segun e colegio di supervision e fondo di SCP mester ta incorpora den Presupuesto 2019  pa asina e gastonan relata na personal cu ta wordo tuma pa ehecucion di e SCP, conta tambe den e maximo di 479 miyon. Segun CAFT su interpretacion di e Protocol di november 2018, e SCP ta forma parti di Presupuesto di Pais Aruba. Segun Gobierno e SCP ta un fondo cu a wordo lanta apart cu su propio presupuesto manera otro fondonan di inversion cu Aruba a yega di conoce y no ta forma parti integral di e Presupuesto di Pais Aruba pa 2019. Banda di esaki e fondo di SCP no tabata topico tampoco di e negociacion pa yega na e Protocol di 2018. E diferencia di opinion aki entre Aruba y CAFT a escala na nivel di politica entre Aruba y Hulanda por medio di un conseho di CAFT na Conseho di Minister di Reino consehando e organo pa duna Aruba un instruccion por medio di un KB pa instrui Conseho di Minister di Aruba pa cambia e Presupuesto di 2019 pa incorpora e fondo di SCP aden manera cu CAFT a conseha. Tambe ta pidi pa instrui Gobierno di Aruba pa ehecuta e plan di reforma fiscal integralmente y tuma medida necesario pa por cumpli cu e normanan manera fiha den e Protocol 2018.

Share:

1 thought on “Minister Ruiz-Maduro: CAFT a conseha Conseho di Minister di Reino pa duna Pais Aruba un ‘aanwijzing’

  1. A wordo bisa cu e ex prome mandatario ta cana di su mansion pa trabow esta parlamento ,bay ta ganja baka si ta bon den avion I ta orador internacional pa haya fama?

  2. E draai boek di avp is going on full speed cueste lo que cueste manda departamenetonan welga pa mas plaka siendo cu nan ta conciente cu situacion financiero di pais Aruba ta precario ta djies pa nan sinta hari despues pa Aruba haya un aanwijzing .

Leave a Reply

Your email address will not be published. Required fields are marked *