ORANJESTAD – Directie Natuur en Milieu (DNM) ta desea pueblo feliz dia di Dera Gay y pa e celebracion di San Juan ta uno consciente cu amor pa e tradicion cu tin di haci cu cosecha, pero respetando naturalesa y medio ambiente. Alabes kier recorda con nos antepasadonan a promove tradicionnan y custumbernan cu te dia di awe ta forma parti di nos cultura. E tradicion di Dera Gay mes ta uno cu ta bin di e celebracion di agricultura cu ta reflexion di un cosecha exitoso. Den e ultimo tempo nos no por papia di cosecha exitoso mas, como cu tin retonan manera yobida hopi limita. Esaki ta nifica cu no lo tin mucho restonan organico pa kima e biaha aki.

 

Antes tawata kima e restonan organico (resto di mata) pa asina por reuza e tera cu e sas den dje pa e siguiente cosecha. No mester clasifica e resto di material organico como sushi. Hendenan a bin ta confundi e practica di kima resto organico cu kimamento tradicional di resto di sushi no-organico. Consecuentemente hende a cuminsa kima hopi material hunto y esaki ta forma un problema di kimamento sin control riba e dia di Dera Gay. DNM ta desea cu e practica di kima resto di cosecha y agricultura keda uno cu tin haci cu celebracion cultural y no kima desperdicio no-organico sin control.

 

Kimamento no kiermen cu nos mester actua contra ley of causa daño na nos salud, naturalesa y medio ambiente. Pa e motibo aki DNM kier avisa pueblo pa pone atencion na e siguiente puntonan.

• Ta prohibi pa cende candela riba caminda publico. Esaki ta prescribi den ley, articulo 14 di e ordenansa di polis (APV).
• Articulo 8 di APV, ta prohibi pa causa molester na bisiña por ehempel door di cende candela y molester di huma.
• Pone atencion na unda ta cende candela. Tin tereno di naturalesa cu ta protegi pa ley y ta prohibi pa cende candela den e areanan aki. Manera Spaans Lagoen, Parke Nacional Arikok, nos areanan di parke marino. E motibo pa esaki ta cu e candela ta causa daño na nos flora y fauna, cu ta nos patrimonio.

 

Celebracion nacional Dia di Dera Gay 2026 mester ta uno responsabel.  Yuda reduci e impacto cu kimamento tin riba nos naturalesa, medio ambiente y salud, ta e mas sincero deseo di DNM.