Tanki Leendert – Mescos cu añanan anterior, “Fundacion Movemento ta Bida” (FMTB), ta organisa en conexion cu e Weganan Nacional 60+, e candeloso torneo pa biyaristanan 60 + titula “Jani Brokke Memorial 2026”. E torneo aki a dal habri aya n’e palacio di biyar nobo na Tanki Leendert dia 15 di augustus, y lo termina dia 22 di augustus, esta diasabra awor. Un torneo cu a dal portanan di santana habri di San Nicolas te cu Westpunt!

Si shonnan, asina mes, siman pasa 15 di augustus, e cantica “Thriller” di Michael Jackson a para pen bieu ora porta di santana a dal habri y hala di veterano a sali manera zombie cu taco den man bin purba nan suerte kende e aña aki lo titula campeon aña 2026. Un total di 16 participante a “durf’ di enfrenta e challenge e aña aki, entre otro Patrick Henriquez, “Lucky Luke” Tromp, “Sheik” Orman, Ricardo Odor, Juni “Kilowatt” Figaroa, JuniniQuant, Carlos “Pythagoras” Croes, Carlso Dirks, AntonioValenzuela, Ernand Coffie, Monchi Kelly, Enrique, Buchi “Legendario” Briezen, y “last but not least” Edwin “Kwek” Chirino!

E prome tanda dia 15 a bay den ful speed. PatrickHenriquez y Edwin Chirino ta haya un “bye”. Lucas Tromp ta manda “El Jeque sin Fondo” Orman bek pa ATM; Ricardo Odor ta duna Juni Figaroa un “kortsluiting”; Juninita “demolish” Carlos Croes; Antonio Valenzuela ta manda Carlos Dirks p’e rondo di perdedo; Ernand Coffie ta resulta un “te sterke koffie” pa Monchi; Buchi Briezen ta schuif Enrique un banda.

Siguiendo den rondo di ganado, Lucas “Lucky Luke” Tromp ta dal Patrick Henriquez un “quitate tu pa ponermeyo”; Junini ta saca tur Odor di Ricardo; Antonio Valenzuelata baha Coffie su cafeina, y finalmente Edwin Chirino ta bisa Buchi bay haci su huiswerk miho! Cos ta keda hot señores ora Lucas Tromp duna Junini un “enkele reis” p’e loser’s round, y Edwin Chirino un biaha mas ta demostra pakico e ta un dje legendarionan ora e manda Valenzuelabay busca su suerte den rondo di perdedo. Pues shonnan, diasabra awo e final den winner’s round lo ta entre dos legendario! Lucas “lucky Luke” Tromp di Snack Ranchcontra Edwin “Kwek” Chirino di Nevada!

Den rondo di perdedo, e caminda tabata largisimo y ta varios veterano a “bite the dust”, pero na final a keda pa enfrenta otro: Carlos Dirks contra Antonio Valenzuela, y Ernand Coffie versus Junini Quant. Weganan ta sigui diasabra awor 22 di augustus cuminsando pa 2’or di merdia n’e palacio di biyar na Tanki Leendert. Entrada ta gratis pa pueblo en general. Yegaaa!