Riba un 17 di october na aña 1986, a ricibi e grato noticia cu e Comite Olimpico Internacional (IOC) a yama Comite Olimpico Arubano (COA) bon bini na e famia Olimpico. Durante e 4 decada cu a sigui, COA a mira un gran desaroyo di e promocion di e balornan Olimpico y a crea un historia grandi di atletanan cu a representa Aruba riba tarima internacional, mustrando mundo henter e talento di nos isla.
Cu gratitud y deseo di kier sigui traha na bienester di deporte na Aruba, COA ta celebra e momento special aki, cordando riba esnan cu a traha pa logra establece un Comite Olimpico Nacional na Aruba y tur esnan cu a traha di e dia special 40 aña te cu awor cu gran boluntad y esfuerso pa tur e logronan cu ta forma parti di e legado di COA.
COA su legado ta logra yega un “milestone” hopi importante, pero semper cu bista riba e futuro. Nos ta sigui traha pa promove e balornan Olimpico, crea oportunidad pa nos hobennan y sigui promove “Crea un miho comunidad a traves di deporte”.
#COA #40years #TEAMARU #ARUBA #OLYMPISM
