Durante e di dos dia di e curso di Baseball5 a mira e participantenan subi tereno y haci diferente ejercicionan pa asina hunto repasa e tecnicanan cu despues nan lo usa pa educa e hobennan na scol. Hunto cu e entrenadornan di WBSC, a mira un parti teorico parti di mainta pa despues aplica tur locual a repasa den les riba tereno, pa asina mehora e comprension a base di aplicacion practico.
E curso di Baseball5 lo fungi como e inicio di trece e deporte den tur scol, pa asina nan por siña con pa hunga Baseball5, cu ta importante como e lo ta parti di e Weganan Escolar y finalmente na e Weganan Interinsular.
E deporte ta rekeri un espacio relativamente chikito pa por hunga, ademas di poco material, pues un deporte recreativo y competitivo ideal pa por inclui den cualkier programa di deporte na scolnan, barionan y clubnan di Baseball y Softball.