Aruba participando cu muraya di mosaic na San Nicolas

Conscientisando tocante “malnutricion di nos muchanan”

ORANJESTAD, ARUBA (October 18, 2019) – Pronto Aruba ta bai haya su prome muraya di mosaic cu lo pone enfoke riba un di e retonan mas grandi den comunidad cu ta “malnutricion di nos muchanan”. Pa e proyecto aki Cosecha ta colaborando cu artistanan di mosaic local y e Fundacion “Ban uni man pa cria nos muchanan”.

Aruba ta e prome den region pa haya un muraya artistico cubriendo e tema social aki y cu hopi orguyo e partidonan involvi kier forma parti di e comunidad Internacional cu ta traha riba e murayanan aki rond di mundo.

Pa 25 aña caba tin e Fundacion yama Conin na Argentina cu nan meta ta pa combati malnutricion di muchanan. Nan ta haci diferente actividad riba e tereno aki.

Inspira door di e Fundacion Conin, dos aña pasa un periodista ta lanta e “Organización de Murales por un Argentina sin desnutrición infantil”. Muralistanan di mosaic ta wordo invita pa join e organisacion. E meta di e organisacion aki ta pa crea conscientisacion tocante e tema di malnutricion di muchanan y crea conscientisacion di e Fundacion Conin na Argentina cu ta carga e proyecto Internacional aki.

E “Organización de Murales por un Argentina sin desnutrición infantil” a cuminsa colabora cu artistanan Internacional desde aña pasa. Aruba a wordo aserca door di e organización Internacional “Organización de murales ‘Por un mundo sin desnutrición infantil’”. Cu Aruba su participacion, Aruba ta haya e oportunidad riba un plataforma Internacional pa yuda crea conscientisacion. Door di traha un muraya ta kies pa un manera sostenibel y permanente di hiba un campaña door di no usa papel, ta yuda embeyece lugarnan cu arte y e problema di muchanan cu malnutricion ta un problema cu semper mester haya atencion.

E muraya artistico lo wordo traha na San Nicolas, e ciudad di Arte y Cultura na Aruba. A kies e muraya di un tienda cu ta bende articulo di mucha situa den mainstreet cu ta Patrice Store. Muraya di mosaic lo keda pa semper eynan pa conscientisa tocante e reto grandi cu ta malnutricion di nos muchanan.

Pa por traha e muraya aki Aruba mester hopi man di mosaic. E motibo cu e organisacion na Argentina a kies pa un man ta pasobra esaki ta e simbolo di e mucha cu ta pidi bon alimentacion y di esun cu ta dune bon alimentacion. E man cu ta pidi y e man cu ta duna. E enfoke ta riba un mucha cu ta ricibi malnutricion pa motibonan sociaal of economico; door di mal custumber den nos alimento, door di problema cu placa etc.

Tur hende por decora nan man cu mosaic, glas of piedra. Na final lo tin diferente man den diseño di un palo di watapana cu ta nos simbolo di para duro y sigui bula den e bon direccion. E diseño, crea door di Iustrador Ria Arrindell-Broeks, ta duna e piesa su toke local cu Aruba ta duna na e proyecto aki.

Cosecha ta duna sosten den organisa actividadnan pa e campaña aki na Aruba. Den Cosecha su “Creative Center” ta bai tin dos fecha pa por participa na e tayernan pa traha un man di mosaic, esta 1 y 8 di november. Participando na e tayernan menciona bo tambe por forma parti di e bunita obra aki door cu cada man traha di mosaic lo ta parti di e muraya na San Nicolas.

Prijs pa por participa ta 15 florin pa persona pa piesa pa dia y ta inclui algo pa bebe y material. Pa mas informacion por tuma contacto cu Cosecha San Nicolas na telefoon 5878708 of Cosecha Oranjestad na telefoon 5878709. Tambe por manda un email na cosechaworkshop@gmail.com.

Mariniers Kazerne lo contribui cu e muraya aki door di tambe organisa un workshop priva unda nan lo traha man di mosaic pa e bunita proyecto aki.

Si tin hendenan interesa pa ta boluntario pa yuda traha e muraya di mosaic, por contact Cosecha na arubacosechasn@gmail.com. Muralista y artistanan local lo tey presente cu seguramente por uza ayudo ora bai traha e muraya.

Cosecha ta mas cu honra pa yuda cu e proyecto aki na Aruba. E poder di arte ta grandi y tur partido involvi ta cla pa yuda conscientisa y recauda fondo y asina keda minimalisa malnutricion di nos muchanan.

E reto malnutricion di muchanan ta grandi pero na Aruba tin un fundacion activo riba e tereno aki y e fundacion aki yama “Ban Uni Man pa Cria Nos Muchanan”. Fundacion “Ban Uni Man pa Cria Nos Muchanan” ta ofrece desayuno gratis pa muchanan na scol. Un parti di e contribucion genera ta bai pa nan y tambe lo tin un box disponibel durante e actividadnan unda por haci un donacion libremente.

Cosecha, artistanan local y e fundacion no ta solamente aportando na e causa aki pero tambe na desaroyo di e caya grandi di San Nicolas.

Pa mas informacion pa cu Cosecha, por bishita e Facebook page di Cosecha: www.facebook.com/Aruba-Cosecha.

Share:

Leave a Reply

Your email address will not be published. Required fields are marked *