Booshi Wever: MINISTER DI FINANZAS Y PARLAMENTO A HAYA UN “BREVET VAN ONVERMOGEN” ATROBE!!

Cu masha fanfaria gobierno a duna di conoce cu Parlamento unanimamente den un habri y cera di wowo a bay di acuerdo cu e presupuesto 2020. Segun nos Prome-Minister tabata un exigencia di gobierno Hulandes pa e presupuesto pasa prome cu fin di maart! Tambe sra. Wever-Croes a declara cu e aprobacion di e presupuesto tabata urgente, pa asina gobierno por yega na un convenio cu Hulanda pa un prestamo c.q. “schenking” pa Aruba por atende e consecuencianan di e crisis ocaciona pa COVID-19.

Sinembargo, loke sra. Wever- Croes a lubida di menciona cu tabata tin un “aanwijzing” colga riba cabes di gobierno. Na november 2019 Secretario di Estado Knops a declara cu si Parlamento di Aruba no actua conforme  e palabracionnan haci dor di gobierno POREDmep cu Hulanda encuanto e presupuesto 2020, Aruba lo haya un “aanwijzing”!! Knops a avisa Premier bon cla pa no permiti Parlamento hunga e mesun wega cu a tuma lugar na juni 2019, ora dos parlamentario a kere cu nan ta “superman” y cu “eigenhandig” lo pone Hulanda na rudia cu cambionan den e ley di LAft. Pa colmo algo cu e mesun Ministro Presidente, di nan propio gobierno cu nan ta sostene, a acorda cu Hulanda na december 2018. Esta cu ningun cambio por bin sin aprobacion ADELANTA di Conseho di Minister di Reino. Corda cu e tempo ey NO tabata tin e COVID-19!!

Gobierno despues di a tarda mas cu 5 luna cu presupuesto 2020, tabata di hubilo ora a entrega esaki na Parlamento. Supuestamente a presenta un presupuesto cu lo a cumpli cu tur e exigencianan Hulandes y cu hasta tabata tin un surplus. Y Parlamento a comporta su mes manera un “bon mucha”, dor di den menos cu un siman atende cu e ley. Pero con a yega na un surplus den asina corto tempo? A usa e  “toverstok” TRIKINOMICS cu ta a ser yama  un tempo TICOTRONICS?

Sinembargo den menos di 12 ora e presupuesto di 46 miyon di surplus cambia pa un deficit di 1.3 miyon. Esaki a consecuencia di e COVID-19.

Un bon observador lo a por a yega na e conclusion, cu ya cu a cumpli cabalmente cu e exigencianan Hulandes, lo no tin motibo mas pa Aruba haya un “aanwijzing”. Y di e manera aki logra un “zachte lening of schenking” cerca e gobierno Hulandes.  Pero manera a para bira custumber, pueblo mester tuma e declaracionnan di nos gobierno “met een korreltje zout”, pasobra e veredicto di CAft semper ta diametral diferente cu e splicacion di nos gobierno. Y esaki nos ta custumbra cune caba for di 2014.

Un biaha mas a duna tanto CAft, como Hulanda, cuminda pa nan sigui come den nos autonomia. Pakico?

Caft a señala cu un biaha mas NO a ni purba na bin cu cambionan STRUCTURAL den nos finanzas publico. Loke cu nos como pais mester cuminza realisa ta, cu un finanzas publico na ordo ta na e bienestar di nos pueblo y no ta algo djis pa complace cu Hulanda. Lastimente ta scohe  pa sigui goberna nos pais “CON CU TA”! Caft a constata tambe cu un biaha mas gobierno ta usa “baten” cu ta “onzeker”! Cu otro palabra ta usa cifranan IRREALISTICO”!

Y Caft,como e organo conforme e acuerdonan di 2014 (AVPOR) y di december 2018 (POREDmep) cu ta esun cu tin e ultimo palabra, ta duna gobierno di Aruba di conoce cu e tin te fin di mei pa entrega un presupuesto adapta cu ta tene cuenta e realidad  y no di “sprookjes”!!

Pues ATROBE e minister di finanzas a “get catched” y consecuentemente a wordo “op de vingers getikt”. Nos a compronde cu  “poeslief” e minister lo bai cumpli cune tambe, algo cu nos NO ta custumbra di e minister aki.

Un biaha mas a wordo demonstra cu e Parlamento den su TOTALIDAD a faya den su trabou como controlador di gobierno. E Parlamento ciegamente a aproba unanimamente un presupuesto IRREALISTICO.  Awor cu esaki a wordo descubri, e  aprobacion unanime aki di e presupuesto door di Parlamento, cu ta e  organo mas halto di nos Estado di Derecho, a wordo completamente descualifica y degrada. E unico conclusion cu UPP por yega na dje ta cu en berdad nos a perde nos autonomia financiero, cu e minister di finanzas a haya un “brevet van onvermogen” atrobe y cu Parlemento a haya un promocion den su condecoracion y a bira  un SUPER STEMPELPARLEMENT.

Pesey UPP  ta kere den un bloke nacional, mara mannan di e politiconan, y bin cu un Compromiso Nacional, ta necesario pa asina ey mustra Hulanda cu nos mes ta trece solucion. Esaki ta nos unico salida, sino e situacion den cual Aruba ta actualmente lo pone cu Hulanda lo NO  bin impone riba nos, sino Aruba MES lo bay entrega su autonomia na Hulanda. Hulanda casi sigur lo bai tuma esaki cu braza habri, y e tambe malusando COVID-19, probablemente  lo bai propone un “bestuursakkoord” ala Bonaire. Y ya cu nos mes no por mara mannan di e politiconan, otro lo bin maranan pa nos, cu tur su consecuencianan.

Hopi ta bisa cu UPP ta teima hopi riba esaki, pero ta desde 2012 nos ta mustra cu introduccion di reglanan estricto di Good Governance, ta nos unico solucion!  “THE ONLY WAY 2 GO”!!

Partido UPP

Booshi Wever

10 di mei 2020

Share:

Leave a Reply

Your email address will not be published. Required fields are marked *