Rocco Tjon: Destaho publico p’e refineria a inicia

Prome Minister sra.mr. Evelyn Wever-Croes a anuncia cu e destaho publico pa e refineria of otro industria. Dos proceso di “request for expression of interest” a inicia cu ta cana separa pero simultaneamente.

PROCESO DI DESTAHO

Ta asina cu na prome instante ta busca un operador pa e refineria of un industria relata na refineria. E siguiente opcion, pa cual tambe a inicia un proceso pa interesado nan expresa nan interes, ta pa busca interasado den cualkier otro industria cu ta genera cupo di trabou y desaroyo economico.

Den cuadro di transparencia y practicanan di bon gobernacion e documento pa registra ta publica riba website www.government.aw y a habri ayera. E proceso aki lo cera automaticamente despues di 6 siman. Despues lo tuma 4 siman pa evalua y medio augustus lo tin un bista riba tur e opcionnan.

REFINERIA DI ARUBA Y GOBIERNO DI ARUBA

Manera prome minister sra.mr. Evelyn Wever-Croes a indica cu RDA lo tin e trabou importante pa wak tur oportunidadnan strategico pa Aruba. RDA lo lidera e proceso di destaho pues nan tin un rol sumamente importante nan dilanti. Manera indica y publica Gabinete Wever-Croes lo no ta directamente envolvi den e proceso aki, pero lo solamente ricibi e recomendacionnan di RDA.

PA CONCLUI

E oportunidad nobo aki pa Aruba su economia ta door cu Gabinete Wever-Croes a logra termina e contract desastroso cu CITGO. Tin hopi interesado den e refineria y e terenonan y awo mas cu nunca pais Aruba ta den necesidad pa un segundo pilar economico. Esaki ta un oportunidad unico pa mas liher cu ta wordo anticipa nos recupera di e crisis actual.

Share:

Leave a Reply

Your email address will not be published.