Oranjestad, Aruba – Diasabra 26 di october Fundacion Parke Nacional Aruba (FPNA) ta invita comunidad di Aruba pa presencia su Nochi di Pelicula den aire liber na Parke Arikok.
FPNA ta organisa su Nochi di Pelicula pa concientisa y educa e comunidad di Aruba riba diferente topico global relaciona cu nos naturalesa. Diasabra 26 di october pa 7.30 PM lo pasa e prome dos episodio di e documentario “One Strange Rock” di National Geographic caminda diferente astronaut ta duna nan perspectiva di mundo y ta wordo presenta pa e actor Will Smith.
E prome episodio ta relaciona cu oxygeno, experto lo elabora riba oxygeno na mundo y tambe den espacio. E di dos episodio ta relaciona cu un explosion cosmico cu a yuda crea e mundo. FPNA ta extende un invitacion na e comunidad di Aruba pa asisti na e Nochi di Pelicula na nos Centro di Bishitante y asina aprecia nos naturalesa y sinti inspira pa yuda na conserva esaki. E Nochi di Pelicula ta completamente gratis cu posibildad pa cumpra algo di come y di bebe. Pa mas informacion por yama na 585 1234 of bishita nos pagina di facebook; https://www.facebook.com/arikoknationalpark.
