E PROBLEMA DI PARTIDO POR TA UN MUESTRA DI FALTA DI INTEGRIDAD DEN GOBIERNO Y DEN COALICION!

Aruba ta experenciando retonan grandi cu ta rekeri un gobernacion firme y stabil, pero lo contrario ta tumando lugar. E gobernacion actual ta den un impasse y no pa motibo di e pandemia so. Loke a premira for di comienso di e formacion di e coalicion a bin resulta berdad. Pa proteha continuacion di gobernacion, e partido MEP y RED a acepta pa wordo manipula door di Otmar Oduber. Te hasta awor cu supuestamente Oduber ta insisti cu e no ta den POR mas y cu el a sali for di politica, toch e gobierno y principalmente e partido mayoritario den coalicion  parce di ta para tras di e ex-mandatario. E motibo di esaki ta pasobra ta considera Oduber persona clave di partido POR te ainda. Sin su “blessing” no tin gobierno, pasobra tur hende sa cu keto bay e ta doño prinicipal hunto cu un grupo di sponsornan di e partido y cu su instruccionnan mester wordo sigui “al pie de la letra”.

Ta hopi bisto cu interesnan aheno ta purba di wanta e gobierno aki den poder. Esaki a wordo claramente demonstra dor di e reaccion di nos Prome Ministro cu e “royement” di sra. Lopez-Tromp ta un problema di POR. Y despues cu a yama sra. Lopez-Tromp pa tur sorto di cos ata ta bin cu un “comision di intermediacion”, esaki obviamente pa gana tempo.

Pero esaki no ta un problema di POR so, manera Premier ta pretende. E problema aki ta e motibo principal pakico Aruba ta den e situacion financiero-economico actual como tambe e humiyacion cu nos ta pasa aden cu Hulanda. Y pa colmo e ta duna oxigeno na e grito  di “gemeente” aki na Aruba.

Ta bisto cu interes personal y partidista ta evita pa tin un gobernacion drechi basa riba principionan di Bon gobernacion y Integridad. Pa mantene un gobierno ta prefera di cera wowo pa corupcion y dera esnan cu si ta cuestiona  manera e ex-miembro di den parlamento Lejeuz y recientemente sra. Lopez-Tromp cu publica e bagamunderianan cu tabata sosode den Serlimar,  alegando y enfatisando cu loke ela hasi ta simpelmente sigui loke ta para den e “acuerdo di gobernacion” di e coalicion POREDmep, referiendo aki na  loke ta concerni  e reglanan di Good Governance y Integridad!

E “ALGEMEEN REGERINGSBELEID” aki, ta haci e problema di POR un problema di e gabinente Wever-Croes tambe y di henter coalicion, si enberdad nan ta para pa e principionan aki. Aki ta unda cu e Prome Minister mester scohe entre para tras di e maneho aki of keda sostene bagamunderia.

For di unda Otmar Oduber a logra acumula asina tanto poder riba e partido geel, mientras den pasado tabata existi un relacion malo cu integrantenan prominente di e partido? E poder aki ta bin dor di placa acumula y interesnan agrupa! Durante su trayectoria politico den AVP el a percura pa acumula hopi placa, procedente di sponsornan influente. Esaki a permiti’e tambe lanta un partido y core un campaña miyonario den un tempo cortico, adkiriendo candidatonan cu basta voto den eleccionnan anterior, manera un Andin Bikker, cu su pasenshi a cuminsa caba ya cu e no por bira minister y tambe Marisol Lopez-Tromp di un trayectoria largo den politica.

Desde formacion di coalicion POREDmep, POR tabata tin e poder total. Nada no por a para e minister Oduber y ningun hende den coalicion tabata tin e pudor di cuestiona su maneho. A permitie desangra Serlimar, “overrule” e minister di turismo (cu diripiente a bira primo) pa por bin cu un hotel na Sero Colorado. A “sjoemel” un destaho pa faborece e compania di siguridad di su colega di partido Alan Howell, pa e por keda opera na Dump. Por cierto ora a kita e contrato “per direct” e NO a demanda Serlimar, mientras den e rapport financiero e suma di e contrato aki NI ta aparece. Un contrato cu porcierto Ricardo Croes di RED a usa contra Alan Howell, pero pa bienestar partidista a baha cabes y a sigui apoya e bagamunderianan den Serlimar.

Asina aki e tambe a consenti e actonan bochornoso di e ex-minister. Otro caso cu no a tende nada di dje ta esun di bendemento di kavel durante e periodo di carnaval, unda un miembro di POR tabata envolvi. Pakico? Pa evita mas escandolo? Cu un record asina kico nos lo tin cu pensa riba henter e “bon intencion” di nos Prome Minister pa loke ta trata “integridad” y “integriteitskamer”?

Apesar cu minister Lopez-Tromp den Parlamento a sostene e maneho corupto di e ex-minister, esaki no tabata suficiente pa permiti un atake frontal contra integridad di minister Lopez-Tromp, kende obviamente no tabata tin e intencion di sigui “al pie de la letra” e instruccionnan di Oduber. Pa UPP ta hopi cla cu e minister lo no por carga e responsabilidad y wordo tilda di ta complice di tur loke el a hereda di minister Oduber, ya cu sigur su actonan a surpasa tur limite di integridad.

Nos ta spera cu nada stroba e berdad sali na cla. Y cu TUR esnan cu a prefera di “PARA WAK” y a permiti pa e ex-minister masacra e compania estatal, compronde cu nan ta co-responsabel y cu nan tin e deber di defende e compania estatal cu tin derecho di existencia. Tanto Parlamento “NOBO y DIFERENTE”, ATIA como sindicatonan tampoco no por laba man y nan tambe mester wordo poní responsabel pa loke nan a permiti pasa den Serlimar.

Den e proximo dianan pueblo di Aruba lo bay haya sa si e palabra “INTEGRIDAD” ta conta realmente of ta solamente un grito populista!

Partido UPP

Booshi Wever

14 juni 2020

Share:

Leave a Reply

Your email address will not be published.