MiniROIM Marisol Lopez -Tromp:Prome grupo di cunukero a firma acuerdo di otorgamento / traspaso di tereno di huur

Diamars atardi den un rueda di prensa Minister Marisol Lopez – Tromp a anuncia e prome grupo di personanan / cunukeronan cu a bin na remarke pa firma acuerdo di huurgrond. Ta trata un grupo di 19 persona cu a haci peticion pa ricibi tereno pero tambe algun traspaso di tereno pa famianan.

Mientras cu Aruba tabata pasando den un situacion dificil cu hopi preocupacion y incertidumbre causa pa e pandemia di Covid-19. Departamentonan cu ta resorta bou di Ministerio encarga cu Desaroyo Teritorial, Infrastructura y Medio Ambiente, a inicia cu reunionan pa atende cu proyectonan cu por ‘fast-track’ y alaves atende cu e tema di demanda pa alimentacion ‘food security’.

Den cuadro di esaki Minister Lopez – Tromp conhuntamente cu DIP a inicia cu un proceso di re-inscripcion y inscripcion pa tereno huurgrond.  Meta di e maneho aki ta pa stimula economia local a traves di sector agricultural. Den e plan di desaroyo teritorial (ROP), tin terenonan destina pa plantacion cual ta e parti cu e departamentonan a bin ta traha riba dje. A pesar cu door di e crisis no por a yega cerca di otro, a tene reunionnan online cu entre otro DIP, DOW, Kadaster, DNM, organisacionnan financiero y sector priva pa fiha prioridadnan. ‘Hopi preparacion y esfuerso a wordo haci pa percura cu por garantisa continuidad’, Minister Lopez – Tromp a accentua! E maneho di huurgrond ta dirigi na esnan cu ta desea di haci plantacion como hobby/ pasa tempo, pero tambe den forma mas structura pa trece cuminda riba mesa di famianan na Aruba.

Banda di e reunionan,  Minister Marisol -Lopez Tromp a bishita varios cunucu pa haya un bista di e realidad di cunukeronan. Locual cu a resalta ta e necesidad pa awa na un prijs reduci. Un deseo cu pa basta aña a bin ta traha riba dje cual tabatin mester un empuhe pa bira realidad. Esaki a wordo haci posibel cu cooperacion di WEB y Utilities. Reduciendo e prijs di awa pa cunukero di 9.50,- kuub pa 5.50,- kuub. Conhuntamente cu criterianan pa e ta algo structural y duradero.

Pa conclui Minister Lopez – Tromp a accentua cu e intencion ta cu e proceso pa planta por sosode den forma harmonioso y exitoso. Pesey a tuma tempo pa prepare bon conhuntamente cu esfuerso di diferente departamento menciona. Deseando pa cada cunukero sigui cu e trabou pa planta y pa pasa e conocemento pa nos generacion di hobennan cu ta necesario pa percura pa durabilidad di e sector aki na Aruba. 

Share:

Leave a Reply

Your email address will not be published. Required fields are marked *