‘Di un dia pa otro tur cos ta diferente’ y ‘Shon Wantomba y e celebracion di Dia di San Juan’
ORANJESTAD – Diamars atardi Minister di Cultura Xiomara Maduro a haci entrega di un USB na Minister di Enseñansa Sr. Rudy Lampe, cual tur scol basico a ricibi pa nan por usa como material educativo. E USB ta contene un buki digital informativo di COVID 19 ‘Di un dia pa otro tur cos ta diferente’. Pa nos muchanan por compronde kico ta pasando, dicon cosnan a cambia y dicon nos mester haci cosnan na un manera diferente.
Mirando cu nos ta den e temporada di Fiesta di San Juan Dera Gay tambe riba e USB tin un video di e buki ‘Shon Wantomba y e celebracion di Dia di San Juan’ pa asina nos muchanan por siña mas riba e celebracion di Dia di San Juan. Un danki di curason na Edselyn Figaroa pa e dos bunita iniciativa y na tur hende cu a contribui pa haci esakinan, cual a wordo haci den nos dushi idioma Papiamento. Minister Lampe a gradici y felicita Minister Maduro pa e excelente trabao.
