Victima a haya 2 tiro den pecho y 1 den lomba y nan a bay cu su auto
Diabierna anochi a drenta informe di un caso di tiramento cu hende herida na Weg Fontein, mesora a dirigi tanto polis como ambulans na e sitio. Na yegada di e patruya a bin compronde cu aki ta trata di un caso unda un persona a presenta eynan cu 3 tiro den su curpa 2 na su pecho y un na su lomba y e 3 desconocidonan a bay cu su auto for di e sitio. Ta trata di un Ford Fusion 2010 silver A74260. Na yegada di e ambulans nan a cuminsa atende e victima mesora y a transporte cu urgencia pa hospital. Polisnan mesora nan a cuminsa tira bista pa e auto riba caminda. Un patruya a topa cu e auto na candela banda di santana na Zeewijk. Mesora a avisa tur autoridad competente.
