Pabien Aruba! PARLAMENTO A APROBA LEY DI OMBUDSMAN UNANIMAMENTE

Danki na Parlamento di Aruba

Diaranson 9 di September 2020, Parlamento a aproba e ley di Ombudsman. Un ley cu a cuminsa di tempo di ex Parlamentario Zulay van Poppel (MEP). Despues como Parlamentario e tempo ey, Prome Minister Evelyn Wever-Croes a sigui traha riba e ley aki sinembargo e tempo ey no a haya cooperacion di e Gobierno anterior. Tur fraccion den Parlamento e ora a cera cabes y a prepara e ley y diaranson ultimo Parlamento unanimamente a aproba e ley.

Esaki ta e prome paso pa Aruba tin su Ombudsman. E Ombudsman ta e defensor di pueblo, cu lo brinda proteccion na pueblo. Un caminda cu un ciudadano por acudi ora cu e ta sinti su mes prehudica of cu su derechonan no ta keda respeta door di Gobierno, instancianan semi-gubernamental y otronan cu lo cay bou di e ley aki.

Ombudsman of e Defensor di Pueblo ta un institucion independiente y imparcial. E Defensor di Pueblo mester evalua kehonan encuanto diferente aspecto di e aparato gubernamental y semi-gubernamental. E mester defende e interes di e ciudadano y supervisa e calidad di e servicionan publico den un pais. Cu otro palabra E Defensor di Pueblo lo yuda comunidad investigando nan keho y of denuncia.

“Haci E Defensor di Pueblo un realidad ta un di e metanan proponi den e acuerdo di gobernacion di Gabinete Wever-Croes mirando cu e ta fortifica nos estado di derecho y ta aporta na bon gobernacion. E fondonan necesario ta aloca den presupuesto 2020 di mi ministerio y nos lo cuminsa mesora cu e operacion di e oficina aki. ”, Prome Minister Evelyn Wever-Croes a enfatisa.

Prome Minister a indica cu e siguiente paso ta pa incorpora e Ombudsman den Staatsregeling y pa Parlamento cuminsa e procedura independiente y imparcial pa nombra un Ombudsman.

“Awe ta un gran dia. DANKI na Parlamento pa pasa e ley aki”, Prome Minister Evelyn Wever-Croes a enfatisa.

Share:

Leave a Reply

Your email address will not be published. Required fields are marked *