Campeonato fast pitch femenino di ASB a termina Den un wega dramatico Aruba Bank Lady Tigers ta derota Eagles 7-6 pa titula campeon

Campeonato HEINEKEN fast pitch femenino AA a termina den un wega emocionante y dramatico. E dos fuertte equiponan Aruba Bank Lady Tigers a enfrenta Eagles den un serie di best out of 3 pa determina kende lo titula campeon 2019 di pais Aruba. E equipop di Eagles a logra jega final invicto y den e promer wega di e serie final Eagles ta laga Aruba Bank den tereno 1-0. Den e di dos wega Aruba Bank Lady Tigers ta derota Eagles 5-4 empatando e serie 1-1 forsando un wega desisivo alaves kibrando invicto di Eagles. Den e tercer wega y pues e wega final Eagles perdiendo 7-5 den bom di 7 ta jena base sin out y ta anota un careda pa hasi e wega 7-6 cu basenan jen sin out. Rudlyn Ras ta preta brasa y ta sali di Gilda James quinto toleto kende tabata tin dos hit riba e anochi cu un fly pa tercera. Yee Mei Beba Cheong un rising star kende tambe tabata tin dos hit ta wordo domina cu un rolling pa short unda e short ta forsa e out na home. Basenan ta keda jen cu 2 out Destiny Johnson ta wordo domina cu un rolling pa tercera y asina Aruba Bank Ladt Tigers a subi tereno pa celebra nan titulo. Un wega cu hopi emocion. Den di dos inning Aruba Bank ta coecta dos hit back to back y Ilajay Tromp ta cuadra pa toke unda e pitcher Melliziene Richardson ta tira malo tercera y e bala ta lora bay te den skina di leftfield y tres careda ta anota riba e hungada aki cual a pisa hopi tempran den e wega. Mihor bateadornan pa Aruba Bank Lady Tigers ta Nikkaela Jacobs di 3-2, Ilajay Tromp 3-1 cu un doblete, Yonina Sint Jago di 4-1 cu un doblete, Shakeena Croes y Carianne Brete ambos di 4-1 y Gabriela Geerman di 3-1. Pa Eagles a destaca na plato Ashmilayne Maduro di 2-1 cu un doblete, Xiorcaniyx Vargas di 3-1 cu un doblete den muraya den clutch den bom di 6 impuhando 2 careda, Sharlanee Richardson, Gilda James y Ye Mei Beba Cheong tur a bay di 4-2, Giandra Thiel di 2-1 y Mellizienne Richardson di 4-1. Rudlyn Ras ta enfrenta 34 bateador tirando 38 bola, 72 strike pa un total di 110 lansamento permitiendo 6 careda tras di 10 hit regalando 2 base por bola propinando 3 ponche poniendo e victoria riba su nomber y ta bay cu e premio MVP di e serie final. Mellizienne Richardson ta resulta pitcher perdedor enfrentando 36 bateador tirando 34 bola, 77 strike pa un total di 111 lansamento permitiendo 7 careda tras di 7 hit y ta regala 2 base por bola ponchando 4 bateador. Mellizienne ta ricibi e premio di champion pithcer di campeonato cu 7 victoria y 0 derota. Nos lo amplia despues e premionan individual. Aruba Softball Bond kier gradisi cuerpo di umpires den man di Zuleyka Willems y scorers den man di Fano Croes, FFD y Sports Subsidie Aruba, Romar Trading y Heineken, Directiva di Aruba Softball Bond, miembronan di diferente comision y Minister Danqui Oduber y tur cu di un of otro froma a duna un contribucion na e deporte di softball pa nos por tabata tin un bunita campeonato. Pabien na tur atletanan cu a competi, danki na managers y coaching staf di tur equipo. Pabien Aruba Bank Lady Tigers cu boso titulo y pabien Eagles cu titulo di sub campeon.  Pabien Aruba!

Share:

Leave a Reply

Your email address will not be published. Required fields are marked *