DIMAS ta splica proceso di Obhecion riba desicion di permiso


Un cliente cu no ta di acuerdo cu un desicion tuma door di DIMAS riba su peticion di permiso tin e derecho di entrega un carta di obhecion. E cliente por entrega su obhecion digital solamente via di e e-helpdesk riba e website di DIMAS www.dimasaruba.aw.
E cliente tin un termino di tempo di 6 siman pa e entrega un carta di obhecion desde e fecha cu ta para riba e desicion “Beschikking” ricibi for di DIMAS via email.
Con e proceso ta sigui cana?
Una bes DIMAS ricibi e carta di obhecion via di e canal indica, lo procede pa boek esaki den e sistema y e cliente lo ricibi un confirmacion via email cu su carta di obhecion a wordo ricibi.
Evaluacion di Obhecion
Na momento cu DIMAS ricibi e carta di obhecion lo bay evalua si e ta entrega den e termino di 6 siman. Den caso cu e carta di obhecion ta acceptabel ta significa cu e persona e entrega esaki den e termino stipula hunto cu tur e rekisitonan necesario pa e por wordo (re)evalua door di e departamento huridico di DIMAS.
Si e carta di obhecion wordo declara no acceptabel pa motibo cu e la wordo entrega mucho trempan of mucho laat e cliente lo ricibi un carta for di DIMAS via postkantoor y via email. Cu e carta aki e cliente por bay corte.
LAR
Si e carta di obhecion a wordo entrega na tempo pero e no ta cumpli cu e minimo di rekisitonan cu ta necesario pa e caso wordo (re)evalua, e caso lo wordo manda pa comision di LAR cu lo bay trata e caso. Comision di LAR lo duna DIMAS un conseho y DIMAS lo tuma un desicion final a base di e conseho ey. Si e persona no ta di acuerdo cu e desicion tuma, e por bay corte dentro di 6 siman desde e fecha di e desicion.

Casonan Frequente
Mayoria di biaha cu DIMAS ricibi carta di obhecion ta casonan cu por wordo re-evalua a base di hechos y circumstancianan nobo presenta. Motibonan frequente cu por wordo re-evalua door di DIMAS na 2020:
 E cliente a logra entrega e documentonan cu tabata haci falta hunto cu su carta di obhecion por ehempel e documento di DPL.
 E cliente por a demostra cu e la cumpli cu e pago door di e manda e comprobante di pago. Mayoria di bes ta pasobra e cliente a paga di un otro forma cu DIMAS no a indica y e pago no por a wordo “cleared” door di Departamento di Impuesto.
Plaso di desicion
Segun e ley y maneho DIMAS tin 12 siman pa duna e cliente un respuesta riba un carta di obhecion. Den caso cu ta necesario esaki por wordo prolonga te na un maximo di 24 siman en total desde e fecha cu e carta di obhecion a wordo entrega.
Resultado
Na momento cu un carta di obhecion cana su proceso y wordo evalua e cliente lo ricibi un desicion positivo of negativo. E desicion final lo wordo manda pa e cliente via di e emailadres cu e la registra den su peticion.
Pa mas informacion por bishita nos website www.dimasaruba.aw y pa entrega un Carta di obhecion por haci esaki unicamente di forma digital via di nos e-helpdesk Bezwaar/ Objecion / Appeal.

Share:

Leave a Reply

Your email address will not be published.