Sociaal Economische Raad (SER) ta conseha tocante cambionan den e Landsverordening winkelsluiting

Recientemente SER a haci entrega na gobierno di e conseho ‘Wijziging Landsverordening winkelsluiting’. E conseho aki ta basa riba peticion di gobierno, caminda Minister di Finansas, Asunto Economico y Cultura, sra. Mr. X.J., Maduro a pidi SER pa vocifera su opinion y duna su recomendacionan encuanto e cambionan proponi door di gobierno pa cu e ley tocante orario di cierre di tienda.
E cambionan proponi pa gobierno ta encera entre otro ampliamento di e orario di habrimento di tienda y tambe mehoracion di e capacidad di supervision pa cu esaki. Segun gobierno e cambionan aki lo ta beneficioso y positivo pa cu actividad economico.
Den e conseho menciona por lesa cu SER ta di acuerdo cu mayoria di e cambionan proponi door di gobierno y ta comparti e opinion di gobierno cu e cambionan aki ta necesario, cu un excepcion chikito relaciona cu orario ariba diadomingo y dianan di fiesta. Ampliacion di ley di orario ta duna e comerciante e opcion di habri pa mas ora y pa habri riba diadomingo y dianan di fiesta (cu excepcion di dia di labor/obrero).
SER ta di opinion cu e orario di habrimento di tienda ariba diadomingo y dianan di fiesta (cu excepcion di e dia di labor/obrero) mester wordo amplia aun mas cu locual gobierno ta propone y cu e orario mester ta igual na e ampliacion proponi door di gobierno pa cu e dianan laboral esta di dialuna te cu diasabra. Consecuentemente, SER ta recomenda gobierno pa hasi e prohibicion di e habrimento di tienda ariba diadomingo y dianan di fiesta (cu excepcion di e dia di labor/obrero) tambe prome cu 6or di mainta y despues di 12or di anochi. Door di iguala e diadomingo y dianan di fiesta (cu excepcion di e dia di labor/obrero) cu e dianan laboral, mas actividad commercial por wordo desaroya mirando cu esaki por hasi Aruba, principalmente pa turistanan, mas atractivo y mas competitivo cu e desaroyonan internacional caminda tiendanan si sa keda mas largo habri. Den cuadro di esaki SER tambe ta conseha pa eventualmente ora di hasi e cambionan den e “Landsverordening winkelsluiting” pa hasi e cambionan correspondiente den e leynan laboral.
Ademas SER ta conseha pa, den cuadro di mehoracion di e bevoegdheden die e toezichthouders, inclui e posibilidad pa por sera un tienda cu ayudo di polis si ta necesario.

E conseho ‘Wijziging Landsverordening winkelsuiting”, manera tur otro rapportnan/consehonan di SER, ta disponibel pa publico ariba e website di SER www.ser.aw. Pa mas informacion tocante e trabao di SER y/of su rapportnan/consehonan por bishita e website www.ser.aw of tuma contacto cu e Secretariado di SER na telefon 583-2713 of via e email info@ser.aw.
Diahuebs, 12 oktober 2020

Share:

Leave a Reply

Your email address will not be published. Required fields are marked *