ACUERDO POLITICO ENTRE ARUBA Y HULANDA

Gobierno di Aruba y di Hulanda a yega na un acuerdo politico pa locual ta trata e di tercer tranche di sosten di likides pa aña 2020. Den e acuerdo aki ta realisa compromisonan pa un cooperacion di varios aña entre e dos paisnan, a base boluntario, pero no sin obligacion.

A cambio di reformanan na Aruba, e Gabinete Hulandes ta ofrece sosten di likides nobo y lo inverti tambe den varios area di desaroyo di Aruba. Hulanda lo brinda Aruba sosten riba e reformanan structural cu a wordo acorda. Ademas di sigui cu e sosten di likides pa cubri e deficit cu a surgi a raiz di e crisis di Corona, Hulanda lo yuda tambe cu conocemento y experticio. Pa esaki ta institui e organo Caribisch Orgaan voor Herstel en Ontwikkeling (COHO) cu hunto cu e ministerionan di Aruba y den consulta cu stakeholders, lo caba di traha riba e reformanan. E organo aki lo yuda tambe cu e implementacion. COHO no lo asumi e autoridad di Parlamento, Gobierno y ningun organo gubernamental; den e negosacion hiba esaki a wordo enfaticamente acorda y specifica den e acuerdo. Sinembargo, COHO por supervisa e implementacion di e reformanan structural y por mara consecuencia na cooperacion insuficiente.

Cu e acuerdo aki, Hulanda ta duna Aruba e sosten di likides di 209 miyon florin (105 miyon Euro) te cu fin di e aña aki. Hulanda lo yuda Aruba tambe cu e refinanciamento di mas cu mey biyon florin di debe. Esaki ta duna bentaha di interes di mas cu 80 miyon florin (40 miyon Euro) den comparacion cu financiamento riba e mercado financiero.

Banda di esaki te cu aña 2025, lo bin un suma total di 17.9 miyon Euro disponibel pa fortalece Aruba su estado di derecho.

Prome Minister Evelyn Wever-Croes

“Cu e acuerdo politico aki ta cuminsa un etapa nobo pa Aruba.Covid-19 tabata tin un impacto hopi grandi riba Aruba, asina grandi cu sin ayudo Aruba no lo sali afo. Aruba mester di yudansa pa esaki, no solamente pa e sosten di likides, pero tambe pa e reformanan pa crea un fundeshi economico fuerte y resiliente cu por wanta shocknan den futuro. Aruba ta agradecido na Hulanda y ta aprecia e ayudo brinda. Hunto nos lo traha pa un economia mas fuerte, un autonomia mas fuerte pa un Aruba mas fuerte”.

Secretario di Estado Raymond Knops: 

“Cu e acuerdo politico aki, ta traha riba e reformanan structural necesario cu mester haci e economia y comunidad di Aruba mas resistente di forma duradero. Banda di reformanan tin tambe espacio pa inversion riba e isla. Aruba mester sali mas fuerte for di e crisis aki, pasobra e hendenan na Aruba merece un perspectiva social y economico. E acuerdo politico aki ta un paso importante den esey. Pero cu e acuerdo aki e trayecto no a finalisa. Riba un cantidad di tereno, manera reforma di pensioen pa minister- y miembronan di Parlamento, riba termino cortico Aruba lo tin cu tuma pasonan ainda pa por bin na remarke pa mas parti di e sosten di likides. Mester ehecuta e reformanan inclui den e pakete pa pais di berdad tambe. E ora ey so prosperidad ta vislumbra na horizonte pa e ciudadanonan Arubano. Esaki ta exigi sinembargo esfuerso continuo di tur partido na Aruba.”

Share:

Leave a Reply

Your email address will not be published. Required fields are marked *