Investigacion lo mester saca afo kiko ta causando esaki!
For di fin di siman caba a yega na nos redaccion cu tin algo cu ta matando e piscanan den Bubali Plas, tanto piscanan chikito como esnan grandi tambe, tin un amplio variedad di parhanan na e sitio y ta teme cu nan tambe lo por ser afecta. Te ainda no tin reporte di cu e parhanan tambe a ser afecta. Mesora e informa aki a yega na oido di esnan encarga cu Bubali Plas esta Parke Arikok a mobilisa su personal na e sitio pa asina wak te con leu esaki a afecta e bida marino na e plas. Diamars mainta nos tambe a sigui tras di e noticia aki y a trese dilanti cu full e plas ta afecta. Tanto e parti pabao unda e piscanan grandi y tambe pariba banda di e caminda grandi ta afecta unda por mira un gran cantidad di piscanan chikito morto! Nos lo sigui informa.
