Prome Minister Evelyn Wever-Croes: DESVELAMENTO DI E NOMBER NOBO DI CAYA ANGLOSTRAAT PA: RICARDO BERNARDO STATIE ‘PAPA BEN’

Señor Ricardo Bernardo Statie, miho conoci como Papa Ben, a nace na Boneiro dia 3 di april 1914. Como hoben adulto, Papa Ben a estabelece su mes na Aruba y a biba den e Caya Anglostraat pa 60 aña. Papa Ben a fayece aña pasa na e edad di 105 aña. Den su mesun palabranan, riba e pregunta kico ta e secreto di bida largo, Papa Ben a contesta: “No pleita cu otro sino stima otro”. Esaki tambe ta keda como conseho pa nos tur pa nos experencia mas añanan di bida riba nos pida baranca. 

Papa Ben tawata un ciudadano conoci, admira, aprecia y sigur hopi stima na San Nicolas y pa Aruba. Semper e tawata un homber trahado y luchado pa su derecho y derecho di otro. El a mira hopi inhusticia na trahadonan tempo e tawata traha na Lago, y a dicidi di lanta un sindicato pa defende derecho di e trahadonan. Semper el a uza e palabranan: “Si bo sa cu bo ta den bo derecho, niun hende por kit’e for di bo”.

Papa Ben a biba semper agradeci cu Aruba a brinde un hogar pa asina tanto aña, na unda el a conoce su casa y hunto nan a haya 5 yiu. Papa Ben a contribui semper na crecemento di Pais Aruba. Pa cua motibo tambe Aruba semper ta keda agradeci na Papa Ben y ta honra Papa Ben cu nomber di un caya na San Nicolas.

Gobierno di Aruba, diabierna atardi a desvela e nomber nobo di caya Anglostraat na nomber di Ricardo Bernardo Statie. E peticion pa nombra e caya na su nomber tabata acompaña pa 8 lista di firma di bisiña, famia y conocinan. Minister Rudy Lampe a trek e proyecto aki y a haci posibel pa esaki bira realidad. Prome Minister Evelyn Wever-Croes a hiba un discurso cortico na e ocacion.

“Awe mi ta para aki dilanti cu sentimentonan mixto. E ultimo biaha cu mi tawata akinan, Papa Ben tawata presente. Pa Gobierno di Aruba, esaki ta un momento hopi bunita na unda cu ta bay honra Papa Ben nombrando un caya na su nomber como gradicimento na tur loke Papa Ben a haci pa nos. Esaki ta un reconocimento no solamento di e bida di Papa Ben sino tur loke cu e ta representa pa nos pais.

Pa mi Papa Ben tabata un consehero, mescos cu pa e lidernan di MEP sr. Betico Croes y sr. Nelson Oduber. Papa Ben tawata un persona hopi critico caminda cu tawata tin mester pero semper a duna bon conseho y encurashamento. Mi ta gradici Papa Ben, su famia, amigonan di bario pa tur locual a haci pa Aruba. Pabien cu e reconocimento bon mereci”.

Share:

Leave a Reply

Your email address will not be published. Required fields are marked *