ORANJESTAD, ARUBA (December 17, 2020) – Pa temporada di Pasco Cosecha tin diferente actividadnan special.
Cosecha tin anochi di compras na su localidad na Oranjestad y esaki lo tuma lugar diabierna 18, diasabra 19, dialuna 21, diamars 22 y diaranson 23. Den tienda di Cosecha por encontra un surtido varia di Arte y Artesania local y cu certificacion nacional di artesania. Cosecha ta brinda Artistanan y Artesanonan local un espacio unda personal di Cosecha ta bende nan productonan y asina aporta na e comercio local. E anochinan di compras ta te 8.30 pm. Cosecha Oranjestad ta situa den e edificio monumental geel na Zoutmanstraat 1.
Cosecha tambe lo tin Do-It-Yourselfs (DIYs) den tema di Pasco riba e anochinan di compras. Pero tambe diabierna 18 y diasabra 19 di december na su localidad na San Nicolas. E localidad di San Nicolas ta habri di 12.30 pm – 6.30 pm. E DIYs ta un bon actividad pa hasi hunto cu amigonan y famianan. Por ehempel por pinta un tote bag cu un diseño di Pasco riba dje. Tambe Cosecha tin par di DIYs na unda por husa material di recicla, por ehempel boter, driftwood, piedra. Door di ofrece DIYs, Cosecha kier stimula e comunidad pa ta creativo y traha cu nan mannan Arte y Artesania.
Cosecha ta spera cu e consumidor por yuda e Artistanan y Artesanonan local door di cumpra un di nan productonan pa e temporada aki di Pasco y door di bin hasi arte y obra di man den e dianan venidero na Cosecha.
Pa mas informacion por tuma contacto cu Cosecha Oranjestad na telefoon 5878709.
