CLAUSURA DI FESTIVAL DI BUKI 2019 NA PRINCES AMALIA BASIS SCHOOL

ORANJESTAD — E clausura di Festival di Buki 2019 a tuma luga na Princes Amalia Basis School diabierna ultimo cu un celebracion hopi ameno. Alumnonan hunto cu mayornan di diferente scol na Aruba, a bin hunto pa disfruta e show di clausura. Prome Minister Evelyn Wever-Croes a felicita Biblioteca Nacional Aruba pa organisa e siman di Festival di Buki como tambe na Princes Amalia Basis School cu tawata anfitrion di e evento bunita aki.

 

Durante un siman, 14 autor a bishita 64 scol basico, secundario y scol special na Aruba pa presenta diferente buki cu pa e scolnan tawata un experiencia unico.

 

Prome Minister, den nomber di Gobierno di Aruba, a gradici tur autor cu a participa na e Festival di Buki 2019, entre otro autornan di Boneiro, Hulanda, Corsou, di Colombia y especialmente di Aruba. Grandemente nan a aporta pa haci e siman di Festival di Buki exitoso. Prome Minister a felicita tambe e autor Arubiano, señor Richard Dabian, cu e publicacion di su buki “E Faro di Multicolo” cu a wordo gusta hopi pa nos muchanan.

 

Pa otro aña, ya caba a defini e tema cu lo ta ‘Historia’ sperando cu e lo ta tambe cu e mesun entusiasmo y interes pa e Siman di Buki cu tawata tin e aña aki.

 

“Gobierno ta gradici tur esnan cu ta pone lesamento di buki un prioridad. A traves di lesamento di buki, un mundo nobo yen di aventura y conocemento ta habri pa nos muchanan. Tambe lesamento di buki ta inspira nos muchanan y lanta nan interes den studiamento. Den esaki, no ta solamente scolnan ta hunga un rol, pero tur mayor ta hunga un rol hopi grandi pa inspera e interes den nan yiunan pa lesa buki. Ban stimula nos muchanan pa lesa y pa asina habri un mundo di Aventura y conocemento pa nan”, Prome Minister Evelyn Wever-Croes a expresa.

 

 

Share:

Leave a Reply

Your email address will not be published.