Diasabra atardi a drenta informe di cu un borchi grandi a cay riba un dama banda di Pastechi House den Caya G.F. “Betico” Croes, mesora a dirigi tanto polis, ambulans como tambe e equipo di rescate di bombero na e sitio. Na yegada di e patruya a bin compronde cu e borchi di Totto na dado momento a desprende su mes for di edificio y a bin abao baha riba e empleada di Pastechi House cu tabata atendiendo e clientenan sinta pafo di e lugar. E dama a keda abao benta y polis cu ayudo di algun voluntario na e sitio a hala e borchi for di riba e victima. Na yegada di e ambulans nan a atende e dama y a bay cun’e pa hospital e equipo di bombero a yuda pa a hala e borchi un poco mas leu y a avisa D.T.I. pa bini na e sitio.
