ORANJESTAD, ARUBA (31 di maart, 2021) – Den luna di april Cosecha tin dos diferente actividad di pintamento pa publico. Na Cosecha Oranjestad e artista Erika Moran ta cuminsa cu su lesnan di pintamento di 4 siman. Na Cosecha San Nicolas e artista Laureen Eman ta ofrece un workshop di paint pouring.
Erika Moran ta ofrece conhuntamente cu Cosecha un curiculo di lesnan di pintamento. E artista local Erika a siña arte den exterior y ta duna les pa mas di 15 aña. Durante di e lesnan aki cu ta pa principiante, e participante ta siña con pa husa y domina diferente pintura di acrylic, awa y azeta, con pa husa sombra y lus den bo pintura y mucho mas.
E les di pintamento ta tuma lugar riba 4 diasabra, cu ta 10, 17 y 24 di april y 8 di mei. Por registra pa e les di 10.00 am – 12.00 pm of di 1.00 – 3.00 pm. E prijs pa por participa ta AWG 150.00 y ta inclui material y bebida refrescante. Edad pa por participa ta 10 aña bai ariba. E lesnan aki ta tuma lugar na Cosecha Oranjestad.
Laureen Eman ta conoci pa su arte di paint pouring y esaki ta un tecnica cu a bira popular e ultimo tempo. Durante e workshop aki e artista local Laureen ta siña e participante tecnicanan basico pa por crea piesanan unico. Delaster dia pa registra ta 8 di April.
E workshop aki ta di 12.00 – 2.00 pm y e prijs pa por participa ta AWG 60.00 y ta inclui material y bebida refrescante. Edad pa por participa ta 15 aña bai ariba. E workshop aki ta tuma lugar na Cosecha San Nicolas.
Ta importante pa sa cu durante e actividadnan creativonan na Oranjestad y San Nicolas tur precuacion di higiena y seguridad lo wordo tuma en conexion cu Covid-19.
Pa mas informacion por tuma contacto cu Cosecha Oranjestad na telefoon 5878709. Tambe por manda un email na cosechaworkshop@gmail.com.
